Antuut illersornissamut ministerimut: Saliisoqartariaqarpoq

Mingutsitsisimanerit annertuut 87-it annikinnerusullu 540-t, ilaatigut Kalaallit Nunaanni qallunaat sakkutooqarfiinit ukiut ingerlaneranni pisimasut, salinneqarnissaannik piumasaqaatit Anthon Frederiksen-ip nassarpai.

Illuatungeriillu ataatsimiinnerminni manngertitaarnissaat ilimanarluinnarpoq. Mingutsitat tamarmik, tassa amerikamiut sakkutuuisa mingutsitaat ilanngullugit, salinneqarnissaat kalaallit piumasaqaatigaat. Namminersorlutik Oqartussat isumaqarput, amerikamiut Nunatsinni mingutsitsisimanerat qallunaat akisussaaffigigaat, amerikamiummi mingutsitaminnik saliinissaat qallunaanit piumasaqaatigineqanngisaannarnikuummat.

Tamannali qallunaat illersornissamut ministeriata isumaqatiginngilaa, naak kalaallit isumaat paasisinnaalluaraluarlugu.

- Qallunaat sakkutuuisa saliisariaqarnerannut allat mingutsitaannik qallunaat saliisariaqarnerat sanillersuunneqarsinnaanngilaq, taamaammat mingutsitsisimasut saliinissartik namminneq akisussaaffigisariaqarpaat, Nick Hækkerup atuagassiamut "Ingeniøren"-imut ullumi taamatut oqarpoq.

Taassuma nangilluni aamma oqaatigaa, mingutsinneqarsimasut tamarmik ataatsikkut salinniarnissaannik periuseq pitsaanerpaatut isiginagu.

- Imaassinnaavoq suliariniakkat allat, soorlu Mestersvig-imi nunaminertamut atatillugu sulianit misilittakkat iluaqutigineqartariaqassasut. Tassani saliinissamut illersornissamut ministereqarfik 35 miliuuni koruuninik aningaasaliissuteqarnikuuvoq. Suliariniakkami tassani annertuumik uuliamik mingutsitsisimanermik saliiniarnermi uumasuaraaqqat qanoq iluaqutigineqarsinnaanerat misiligarneqarpoq.