Antoenithe Hendriksen ima eqqarsartartoq: Aasiit qineqqusaarutaavugut
- Ima eqqarsartarpunga: Aasiit qineqqusaarutigilerpaatigut. Oqaatsinaasiit kusanartut pilerpaat. Aqutsisut sullissiniaraluarlutik piviusut eqqarsaatigalugit neriuutaarunnartarami, Antoenithe Hendriksen KNR-imut oqarpoq.
Taanna ukiut pingajussaasa missaannik angerlarsimaffeqanngilaq. Nalunngisamini tukkusarpoq, tamannalu allanngungaarnavianngissorivaa.
Naalakkersuisut angerlarsimaffeqannginneq pillugu nassiuaatitut oqaasertaliussaat:
- Angerlarsimaffeqanngitsut sisamanut agguataarneqarput.
- Takussaanerusumik angerlarsimaffeqanngitsuuneq, aqqusinerni, toqqini angerlarsimaffeqanngitsulluunniit unnuisarfianni sinittartut.
- Takussaannginnerusumik angelarsimaffeqanngitsut najukkamik allattorsimaffimmiinngitsut, kammalaatiminni ilaquttaminnilluunniit sinittartut.
- Angerlarsimaffeerunnissamut aarlerinartumiittut, soorlu inigisaminnik annaasaqariaannaasut, inuuniarnermikkut ilungersunartumik inissisimasut.
- Angerlarsimaferruuteriaannaasut, inuit angerlarsimaffillit, kisianni tarnimikkut napparsimanertik pissutigalugu kisimiillutik najugaqarsinnaanngitsut.
Maannali neriuuteqarsinnaanngorpoq. Isumaginninnermummi naalakkersuisoq Jess Svane (Siumut) angerlarsimaffeqanngitsut najugassarsissunniarlugit iliuuseqarniarpoq.
Angerlarsimaffeqanngitsut najugassarsissunnissaat qularnaarneqaqqaassaaq. Kingorna taava iliuusissanik pilersaarusiortoqartariaqartoq, Jess Svane isumaqarpoq. Iliuusissanimmi pilersaarusiornerit inunnik isumaginnittoqarfiit angerlarsimaffeqanngitsut ikiornissaannut aallartinissaataasaraluarput.
Antoenithe Hendriksenip tamanna nuannaarutigaa.
- Assigiinngitsorpassuarnik tunuliaqutaqarluta angerlarsimaffeerunnikorpassuugatta, qineqqusaarutaaginnarnata iliuuseqartoqarnialermat eqqissiallannaqaaq, Antoenithe Hendriksen oqarpoq.
Hanne F. Heilmann
Hanne F. Heilmann aamma angerlarsimaffeqanngilaq, taassumallu Naalakkersuisut angerlarsimaffeqanngitsuerutsitserusunnerat aamma nuannaarutigaa.
- Qanoq ittuunissaa qaqugulu pissanersoq pissanngatigaara. Pisariaqartivipparami oqarsinnaanissara: Maani uanga najugaqarpunga. Aana angerlarsimaffiga, taanna KNR-imut oqarpoq.
Ilisimatusartut Ilisimatusarfimmeersut nunatsinni angerlarsimaffeqanngitsunik kisitsisuupput. Nunatsinnilu angerlarsimaffeqanngitsut 491-iusut, taakkua kisitsinerisa ersersippaat.
Angerlarsimaffeqanngitsunik kisitsineq angerlarsimaffeqanngitsut sapinngisamik pitsaanerpaamik qanoq ikiorneqarnissaannik ersersitseqataassasoq, Jess Svane oqarpoq.
Tamatumani ilaatigut kommunit suleqatiginissaat pisariaqarpoq, kommunimmi angerlarsimaffeqanngitsut najugassarsissunnissaannut iliuusissanik pilersaarusiornissamik pisussaaffeqanngillat.
Angerlarsimaffeqanngitsut amerlanerpaartaat Nuummiimmata, Kommuneqarfik Sermersooq immikkut ukkatarineqassaaq.
Angerlarsimaffeqanngitsut amerlanerpaartaat 30-t 60-illu akornanni ukioqarput.
Nunatsinni angerlarsimaffeqanngitsut:
- Nunatsinni angerlarsimaffeqanngitsut 491-iuppput.
- Nuna tamakkerlugu angerlarsimaffeqanngitsunik misissuineq illoqarfinni aqqanilinni misissuiffigineqarpoq.
- Inuit 293-it takussaanngitsumik angerlarsimaffeqanngitsutut inuupput. Soorlu innuttaasut unnuisarfinni assigusunilu allani atuisut.
- Inuit 183-it takussaanerusumik angerlarsimaffeqanngitsutu inuupput, taakku silami, najugaqarfiit torsuusaanni, angerlarsimaffeqanngitsut unnuisarfianni, najugaqarfikunik toqqinillu unnuisarput.
- Angerlarsimaffeqanngitsut sinneri 15-it ersarissumik paasissutissartaqanngillat.
- Nalunaarsorneqartut saniatigut allanik aamma angerlarsimaffeqanngitsoqarsinnaasoq nalunaarusiami maluginiaqquneqarpoq aamma.
- Angerlarsimaffeqanngitsunit 356-it angutaapput, 135-t arnaallutik.
- Inuit 30-t 60-illu akornanni ukiullit angerlarsimaffeqanngitsut 343-pput. 18-iniit 29-nik ukiullit 80-iullutik. 60-ileereernikut 68-iullutik.
Taakkua 73 procentii angutaapput. 60 procentii angerlarsimaffeqanngitsutut nalunaarsorsimanngillat, tassa ilaquttamik, ikinngutimik ilisarisimasamillu angerlarsimaffiini tattorliuffiusuni tukkusarput.
Angerlarsimaffeqanngitsut neriuutissaqalertut
Antoenithe Hendriksen ikinngutimini ilisarisimasaminilu aamma tukkusarpoq. Taassuma nammineq najugaqalersinnaanissamik neriuutissaqaraluarluni allamik aamma kissaateqarpoq.
- Taanna inissialiarinialeraat tassami kusanaqaaq, aammali sulisutigut, kommunitigut inatsisitigullu suleriusissat aamma iluamik suliarineqarnissaat qilanaarnarpoq.
Pitsaasumik angerlarsimarfittaarnissi qilanaaraalugu, Hanne F. Heilmann aamma oqarpoq.
- Nalunngilara ajornartuuinnermi unnuisarfiusoq ullormiit ullormut atorneqartartoq. Kisianni pisariaqartittarparput oqarsinnaalluta: Maani najugaqarpunga, aana qipiga, akisera atisakkalu. Taava eqqissisimanarnerussaaq. Taannaavorlu ulluinnarni inuunermilu atulikkami uivernermi pisariaqartitara.
Ilisimatusartut angerlarsimaffeqanngitsunik nunatsinni illoqarfinni aqqanilinni aasaq kisitsipput.
Ilaatigut Qaanaami, Nuummi, Nanortalimmi Ittoqqortoormiinilu angerlarsimaffeqanngitsut ornittagaanniillutillu malugitinnaveersaarlutik unnuami inissiarsuit torsuusaannukartarput, taakkunani sinittartut qassiunersut paasiniarlugu.
