Anoraasuarujussuaq Milton Floridamut angummat inuit 15-init ikinnerunngitsut ajunaartut

USA-mi naalagaaffimmi Floridami inuit 15-init ikinnerunngitsut, Miltonimik taasamik anoraasuarsuarmat ippassaq ajunaarput.

Nutaarsiassaqartitsivik CNN taama allaaserisaqarpoq.

Anoraasuarsuit sakkortussusaat 1-imiit 5-imut nalilerneqartarput, 5 sakkortunerpaalluni, Miltonilu 3-tut sakkortutigaluni Floridap kimmut sineriaanut sisamanngornermut unnuaani annguppoq.

Kingorna 1-itut sakkortutigaluni Floridakkoorpoq, illut, aqquserngit, innaallagissap aqqutai aserorterlugit, orpiillu uppikaatiterlugit.

Floridap kippasissortaa ulinnersuaqarpoq, Floridallu kangisissuani kaassaartoqarnerani ajunaartoqarluni.

Inuit anoraasuarsuarmit Miltonimit eqqorneqarnermi ajunaartut amerlanerunissaat naatsorsuutigisariaqartoq, Floridap guvernøriata Ron DeSantisip oqaatigaa.

Annaassiniartartut tuusintilikkaat Florida tamakkerlugu sulitinneqarput, inuillu tuusintinit amerlanerusut annaanneqarsimasut DeSantisip oqaatigaa.

Floridami inuit 2,6 millioninit amerlanerusut innaallagiamik tallimanngornermi ullaakkut pilersorneqanngillat. Inuit innaallagiamik pilersorneqanngitsut unnuap ingerlanerani 3,2 millioniugaluarput.

PowerOutage.us.-ip nitttartagaani tamanna atuarneqarsinnaavoq.