Anoraasuarsuaq Milton angummat sakkukillillunilu arlaleriarluni kaassaartoq
Anoraasuarsuaq Milton USA-mi naalagaaffimmut Floridamut unnuaq annguppoq, anorersuarujussuillu sakkortussusaat 1-imiit 5-imut nalilerneqartarput, 5 sakkortunerpaalluni, anoraasuarsuallu Miltonip sakkortussusaa 1-imut tassa apparsimalluni.
USA-p anoraasuarsuarnik nakkutilliisoqarfia kingullermik taama naliliivoq.
Naallu anoraasuarsuaq Milton sakkortussutsimut 1-imut inissinneqaraluartoq Floridami innuttaasut suli mianersoqquneqarput.
Anoraasuarsuarnik nakkutilliivik National Hurricane Center taama erseqqissaavoq, sulimi sakkortuumik anoraasuartarlunilu siallingaatsiarpoq, qarsutsineqarsinnaallunilu.
USA-mi oqartussat anoraasuarsuaq Milton ulorianartorujussuartut nalilerpaat.
Floridap kangimut sineriaani illoqarfimmi Fort Piercemi kaassaarmat tamaani utoqqaat illuisa ilaat eqqorneqarmat inuit marluk ajunaarsimasutut naluunaarsorneqarput. Nutaarsiassaqartitsivik NBC News taama allaaserisaqarpoq.
Milton Floridamut anngummat kaassaarnerit 19-init ikinnerunngitsut maannamut nalunaarsorneqarput.
Inuit 2 millionit pallillugit Floridami najukkaminnit qimagussorneqarput. Floridap anoraasuarsuarmit Helenemit sapaatit akunnerit marluk matuma siornatigut eqqorneqarneranit suli aamma eqqugaapput.
Anoraasuarsuaq Milton Floridamut anngummat innuttaasut Floridap guvernørianit Ron DeSantisimit angerlarsimaannaqquneqarput.
- Isumannaatsumik qimagussuinissamut maanna ulorianarpallaaarpoq, taamaammat sumiiffimmi oqquiffissarsiortariaqarpusi, Ron DeSantis oqarpoq.