Nobelip aningaasarsiorneq pillugu ilisimatusarnermi nersornaasiuttagaa tunniunneqartoq
Nobelip aningaasarsiorneq pillugu ilisimatusarnermi nersornaasiuttagaa ullumi ataasinngornermi tunniunneqarpoq.
Amerikamiut aningaasarsiorneq pillugu ilisimatusartut marluk, Daron Acemoglu Simon Johnsonilu, kiisalu James A. Robinson, Tuluit Nunaanneersoq, nersornaaserneqartuupput.
Taakku nunat assigiinngitsut aningaasarsiornerisa assigiinngissuteqarnerat ilisimatusarfigisimavaat, nunat ataasiakkaat pigissaassusiisa assigiinngissuteqarnerat ilisimatusarfigalugu.
- Naalagaaffik inatsisit naapertorlugit naalakkersorneqarnerlullunilu innuttaasunik sullissinerluttoq, innuttaminillu atornerluisoq, naalagaaffimmut aningaasarsiornikkut ingerlalluartumut naleqqiullugu ingerlanerlunnerusarpoq pitsanngoriartornanilu. Sooq taamaannersoq nersornaaserneqartut ilisimatuussutsikkut nassuiaateqarfigaat, tusagassiorfinnut nalunaarummi ilaatigut allassimavoq.
Nobelip nersornaasiuttagaa peqqinnissaqarnikkut, fysikimi kemimilu ilisimatusartunut, atuakkiortunut eqqissinissamillu suliniuteqartunut 1901-imili tunniunneqartarpoq.
Sverigep qitiusumik aningaaserivissuata aningaasarsiornermut ilisimatusartunut nersornaat tunniuttalerniarlugu 1968-imi aalajngerpaa, Alfred Nobelip eqqaaneqarnera ataqqiniarlugu taamaaliortalerniarlutik. Nobelip aningaasarsiornermut ilisimatusartunut nersornaasiuttagaa siullerpaamik 1969-imi tunniunneqarpoq.
Nobelip aningaasarsiornermi ilisimatusartunut nersornaasiuttagaa ullumi tassa tunniunneqarpoq, Nobelillu nersornaasiuttagaa ilisimatusaatinut allanut atuakkiortumullu, eqqissinermullu suliniuteqartumut sapaatit akunnerata kingulliup ingerlanerani tunniunneqarluni.
