Anne-Birthe Hovep suliaanik Københavnimi saqqummersitsisoqalersoq
![](/sites/default/files/styles/image_934x467/public/article_images/anne_birthe_hove.jpg?itok=IM98vvHb)
Anne-Birthe Hove Nunatsinni eqqumiitsuliortuni ataqqisaanernut ilaavoq aamma eqqumiitsulioriaasia eqqumiitsulioraangamilu atortagai sammisartagaalu assigiinngeqalutik, tassami pisortat illuutaanni pinnersaanermit frimærkinik titartaanermik suliaqartarsimagami. Taamaattorli assiliartaliortaatsinik suliaqartarnini ilisimaneqaatigigunarpai, tamannami Nuummi Eqqumiitsuliornermik Ilinniarfimmi, Københavnimi Kunstakademimi aamma Kunstpædagogisk Skolemi ilinniagarigamiuk.
Saqqummersitsinermi kingumut qiviarnerusumi, Anne-Birthe Hovep eqqumiitsuliai, inooqatigiinnermut sammigajuttartut isummernerugajuttartulluunniit, Nunattalu ukiuni 50-ini kingullerni ineriartornera malugineqarsinnaavoq. Naak pinngortitaq eqqumiitsuliaanni arlalissuarni qitiusutut inissisimagaluartoq, tunuliaqutigalugit inuup atuuffia inuuneralu pingaarnerusutut takutinniarneqartarput.
Anne-Birthe Hovep uiata Thomas Stensgaardip aamma Bornholms Kunstmuseumip suleqatigiinnerisigut saqqummersitsineq aaqqissuunneqarpoq. Saqqummersitsinermut atatillugu eqqumiitsuliat saqqummersitsinermit immikkut toqqakkat quppersaganngorlugit saqqummersinneqarput, assiliisartumillu Jørgen Chemnitzimit siulequtserneqarlutik.