Anna Wangenheimip Naleraq avoqqaaraa: - Soorunami namminiilivikkusuppugut
Nunatsinni partiit maanna annersaasut, Demokraatit aamma Naleraq, naalakkersuisoqatigiilinngillat. Taakkumi partiit marluk isumaqatiginninniarnerat ajalusoortoq, uuma sapaatit-akunnerata aallartinnerani paasinarsivoq.
Paragraf 21 namminersulivinnissamut sulinermik aallartitsisussaq aaqqiagiinngissutaavoq. Paragraffimmi qaqugu aallartinnissaa taakku partiit isumaqatigiissutigisinnaanngilaat.
Demokraatit namminneq qineqqusaarutitik piviusunngortissinnaanngikkaat, Naleqqami taagunneqarnerpaasoq, Aki-Matilda Høegh-Dam, DR-imut kingusinnerusukkut oqarpoq.
- Naaperiarusoqigatsigimmi Demokraatit namminiilivinnissaq pillugu kissaatigalugit qinequsaarutigisaat allaat atoraluarpagut. Kisianni qineqqusaarutigisatilluunniit peqataaffigerusunngilaat, taanna DR-imut oqarpoq.
Taama isornartorsiuneq Demokraatit siulittaasuata tulliata Anna Wangenheimip avoqqaaraa.
- Ilumuunngilaq. Aalajangernissaq pipallataassanngitsoq qineqqusaarneq tamaat oqaatigisarparput. Namminiilivinnissamut sulineq toqqissisimanartumik ingerlanneqassasoq perusupparput, taanna KNR-imut oqarpoq.
Paragraf 21-p qinigaaffimmi tulliuttumi pinngitsoorani atuutilersinneqarnissaa Naleqqap piumasarigaa, Anna Wangenheim oqarpoq.
Kipparippallaartoq
Naleqqap siulittaasuatattaaq Pele Brobergip isumaqatiginninniarnerni Demokraatit Naleqqamik anisitsisimanerarlugit isornartorsiuivoq.
- Demokraatinit namminiilivinnissaq suliarerusunnginnamikku, taamaammat qanorluunniit Naleraq anisillugu, Pele Broberg KNR-imut ataasinngornermi oqarpoq.
Oqallinnerup ”kipparippallaarnerujussua” Anna Wangenheimip uggorinerarpaa. Isumaqatiginninniarnerimmi akaareqatigiiffiusumik avissaartuuffiunngitsumillu pisimasut, taanna oqarpoq.
- Soorunami namminiilivikkusuppugut, allatulli angorusupparput. Aningaasaqarnitta pitsanngorsarnissaa aamma ilinniartitaanerup siuarsarnissaa anguniarlugu qinigaaffiup kingulliup naalernerani tigussaasunik siunnersuuteqarpugut, taamaalilluta oqartussaaffiit suli Danmarkip paarisai oqartussaaffigiartuaalerniassagatsigit.
- Oqartussaaffiit Danmarkip suli paarisai pillugit qanoq isummerfigineqassanersut pinnagu Naleqqap allatut ingerlanissamik kissaateqarnera, politikkikkullu tigussaasunik iliuusissiunnginnera aarlerinarnerusoq isumaqarpunga, Anna Wangenheim oqarpoq.
