Naleraq naalakkersuisoqatigiinnissamut isumaqatigiinniarnermit anisoq

Naleraq Demokraatit naalakkersuisoqatigilernissaannut isumaqatigiinniarnermit anisoq, Demokraatit siulittaasuata, Jens-Frederik Nielsenip maanna nalunaarutigaa.

- Nunatta inissisimanera aallaavigalugu siammasissumik suleqatigiinnissaq aallaqqaataaniilli aaqqiissut pitsaanerpaatut isigisimavara, ujartorsimallugulu, Jens-Frederik Nielsen tusagassiuutinut nalunaarummi allappoq.

Tamannali iluatsissimanngilaq. Siammasissumik naalakkersuisuutitaqarnissamut isumaqatigiissusiornissamut piumasaqaatit pillugit isumaqatigiittoqarsinnaanissaa pisariaqartoq, taanna allappoq.

- Matumanili Naleraq isumaqatigiissuteqarfiginissaa ajornarsimavoq.

Namminersorneq pillugu isumaqatigiinngitsoqarnera pissutaasoq, tusagassiuutinut nalunaarummi allassimavoq.

- Nalerarlu arlalitsigut isumaqatigiiffissaqarsimagaluarpugut, taamaattorli namminersorneq pillugu inatsimmi §21 aallarnisarneqarnissaanut tunngasumut isumaqatigiiffeqarnissaq ajornarsimavoq. 

Allaanerusumik isigigaa

Naleqqalli susoqarnera allaanerusumik isigaa.

- Inuiaqatigiit allannguerusunnerat ilutigalugu Naleqqamiit isumaqatigiinniarnerit aallartillugit ingerlanneqarsimagaluarput, partii tusagassiuutinut nalunaarummi allappoq.

Isumaqatigiinniarnerit aallartinneranni anguniakkat tamangajaavimmik isumaqatigiissutigineqarsimapput, matumani aalisarnermut inatsisip allanngortinneqarnissaa, pinngitsaaliissummik soraarnerussutisiaqartitsineq allarpassuillu ilanngullugit.

- Demokraatinit namminiilivinnissaq suliarerusunnginnamikku taamaammat qanorluunniit Naleraq anisillugu, NAleqqap siulittasua Pele Broberg KNR-imit apersorneqarluni oqarpoq. 

- Isumaqatigiinniarnermut naaperiutissatut allaat Demokraatit Naalagaaffinngornissamut qineqqusaaruterpiaat Naleqqamiit naaperiaatigineqarsimagaluarpoq. Taamakkaluartorli Demokraatit ilaatigut nammineq qineqqusaarutitik malikkusussimagunarnagit Naleraq isumaqatiginninniarnerniit anisippaat, Naleraq tusagassiuutinut nalunaarummi allappoq.

- Annerusumik aporfissaqanngikkaluarpugut suleqatigiinnissamut arlaannik ujartuerusuttoqarsimappat, Pele Broberg oqarpoq.

Pele Brobergip oqarnera naapertorlugu partiit taakkua marluk suliassanik angisuunik allannguiniarnerminni assigiissuteqaraluarput.

- Pinngitsaalisamik soraarnerussutisiaqarneq, aalisarnermut inatsit allarpassuillu allanngorusutagut, assigiiffippassuagut tassa taakku isigerusuppallaarsimanngilaat.

Partiinut sinneruttunut isumaqatiginninniarnerit suli ingerlapput.