Aningaasartuutit isertitallu oqimaaqatigiissaarnissaat Naalakkersuisut siunniuppaat

"Putumiit nul-imut". Aappaagumut Aningaasanut inatsisissatut siunnersuutip saqqaani taama allassimavoq, Aningaasaqarnermut Naalakkersuisumit Palle Christiansenimit ullumi saqqummiunneqartumi.

Allattoq Mads Lynge

aggustip 07-at 2009 16:13

Aningaasartuutit isertitallu aappaagu oqimaaqatigissaarnissaat siunniunneqarpoq. Sipaarniuteqarnikkut, isertitat nutaat aqqutigalugit aningaasallu isumatusaartumik atorneqarnerisigut tamanna anguniagaalluni.

Aningaasalli sumut atorneqassappat? Palle Christiansen ima akivoq:

- Meeqqanut inuusuttunullu sillimmatissanik illikartitsivugut, suliaritinnissamullu utaqqisut allattorsimaffianniittut ikilisarneqarnissaat siunniupparput, illoqarfinnilu anginerusuni inissianik neqerooruteqarnerulersinnaaneq kissaatigaarput. Akileraarnerusalernikkullu tamanna pissanngilaq, Palle Christiansen oqarpoq.

Taanna aamma oqarpoq pisariaqartoq Nunatta Karsiani 600 millionit koruunit missaannik akiliisinnaassuseqarnissaq. Aningaasanulli inatsisissatut siunnersuummi takuneqarsinnaavoq Nunatta Karsia 532 millionit koruuuninik aappaagu akiliisinnaassuseqalissasoq. Sooq taamaannersoq aningaasaqarnermut naalakkersuisumut apeqqutigaarput.

- Akiliisinnaassuseqanngitsutut nalilerneqannginnissarput pillugu Namminersorlutik Oqartussani tamanna siunniupparput, Nunattalu Karsiata ikinnerpaamik 600 millionit koruuninik imaqarnissaa qulakkeerumallutigu. Ingerlatseqatigiiffinnulli ilanngaasereerlugit taarsigassarsisitsigaangatta Nunatta Karsia 600 millionit koruunit ataallugit imaqarsinnaasarpoq. Nunanit allanit taarsigassarsianik pissarsisinnaanissaq maanna ujartorparput, taarsigassarsialli qanoq annertutiginersut maannangaaq oqaatigisinnaanngilara, Aningaasaqarnermut Naalakkersuisoq Palle Christiansen Radioaviisimut oqarpoq.

Ingerlatseqatigiiffinnut ilanngaasererlugit taarsigassat iluarsiisoqareerpat 2013-imi 100 millionit koruuninik sinneqartooruteqarnissaq Naalakkersuisut siunniuppaat.

Isertitaqarnerunissaq anguniarlugu atuisut akiliutaannik ilaatigut eqqussiniartoqarpoq, akitsuutitigullu aamma isertitaqarnerunissaq anguniarneqarluni. Suut akitsuuserniarneqarnersut, Aningaasaqarnermut Naalakkersuisup Palle Christiansenip oqaatigisinnaanngikkallarpaa, aappaagumulli aningaasanut inatsisissatut siunnersuut ukiaru saqqummiunneqalerpat tamanna piumaartoq oqaatigalugu.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.