Aningaasartuutit isertitallu oqimaaqatigiisinniassavaat

Kalaallit Nunaanni Aningaasaqarnermut Siunnersuisoqatigiit nalunaarutaat kingulleq tunuliaqutaralugu Inatsisartuni oqallittoqassaaq, Nunattalu karsiata ajornarsiuteqarnera tassani oqaluttuarineqarpoq.

Pisortat ukiuni kingullerni isertitanut naleqqiullugit aningaasartuuteqarnerusimanerat pissutaalluni Nunatta karsia ajornartorsiuteqarpoq. Pisortat aningaasartuutaat isertitanit annertunerusumik ingerlaavartumik amerliartorsimapput, sinneqartooruteqarnermiillu amigartooruteqartalerneq aningaasartuutinik aqutsisimannginnermik annertunerusumik tunuliaquteqartoq, Aningaasaqarnermut Siunnersuisoqatigiit ilaatigut allapput.

Isertitat aningaasartuutillu assigiissinneqanngippata, Nunatsinni atugarissaarneq ullumikkutut isikkoqartillugu attatiinnarneqarsinnaanngilaq, aningaasaqarnikkummi politikki attanneqarsinnaanngippat pisortat atugarissaarnermut aningaasaliuttagaat isertitatut allatulli annertusiartorsinnaanngillat.

Assersuutigalugu utoqqaat amerlanerulernerat inuussutissarsiortullu ikileriarnerat pisortat sullississutinut aningaasartuutaannut amerleriaataassapput.

- Imaaliallaannarlu aaqqiissutaasinnaasunik peqanngilaq, Aningaasaqarnermut Siunnersuisoqatigiit oqarput.

Aningaasaqarnermullu ataatsimiitialiamit tamanna aamma eqqumaffigineqarpoq:

- Misilittakkat tunngavigalugit nalunngilarput tapiissuteqartarnermik aaqqissuussinerit ikilileriffiginissaat allaffissornikkullu aningaasartuutit appartinneqarnissaat qanoq ajornartigisut. Allaallumi ingerlatsinermut aningaasartuutit qaffatsaaliorneqarnissaannaalluunniit unammillernartuuvoq, Aningaasaqarnermut Ataatsimiititaliaq allappoq.

Tamannalu Inatsisartunut ilaasortanit malinniarneqarnersoq ullumi oqallinnermi paasinarsiumaarpoq. Aningaasaqarnermut naalakkersuisup Maliina Abelsenip malinniarpaa, isertitammi aningaasartuutissallu assigiinnissaat taassuma siunniuppaa.

Aningaasat 28 millionit koruunit missaanniittut isertitatigut sipaarniuteqarnikkulluunniit nassaarineqartussaapput. Poortuutissat pillugit nalunaarusiap allanngortinneratigut akitsuutitigut isertitaqarnerunissaq eqquiniaasitsinermilu akileraarutit qaffanneqarnerisigut isertitaqarnerusinnaanissaq, Maliina Abelsenip siunniuppaa, assigiinngitsutigullu sipaarniuteqarnikkut isertitat aningaasartuutillu assigiinnissaat anguniarlugu.

Aappaagumut aningaasanut inatsisissatut siunnersuut Inatsisartut ukiaanerani ataatsimiinneranni, marlunngornermi novembarip ulluisa 14-ianni pingajussaaneerneqassaaq.