Aningaasaqarnermut Siunnersuisoqatigiit: Ilinniartitaaneq qaffanneqartariaqarpoq
Nunatsinni aningaasarsiorneq suli siuariartorpoq. Piffissami sanaartorfiusorujussuarmi, tamatumani mittarfiliortiternerit annerit ilaanniillutik, aningaasarsiorneq 1 procentimik siuariarsimavoq.
Sulisut amerlapput, aningaasarpassuarnillu atuimmata, pisiniarfissuit annerit pingasut kaaviiaartitaat 7,8 procentimik qaffariarsimapput.
Taavalu avataasiorluni raajarniarneq ingerlalluarpoq, raajartassiissutillu biologit innersuussutaannit amerlanerunngikkaluartut pisat ukiut tallimassaat amerleriarlutik.
AAMMA ATUARUK Siunnersuisoqatigiit: Nunarput ajornartorsiorfimmi naatsorsuutigisamit ajunnginnerusumik ingerlavoq
Covid-19-ip nunarsuaq tamaat tuniluunnerani taamaattoqarpoq, nunarpullu nunanit amerlanernit nappaammit aningaasaqarnikkut eqqugaannginneruvoq.
Piffissaq ungasinnerusoq eqqarsaatigalugu unammilligassat
Piffissarli ungasinnerusoq eqqarsaatigalugu suli unammilligassaqarpoq.
Minnerunngitsumik sulisussarsiornermi. Sulisut amerlagaluarlutik sulisussaaleqisut suli amerlapput.
Aalisarneq pisortanilu aaqqissuusseqqinnikkut taakkunani sulisut allani atorfissaqartitsinerusuni soorlu sanaartornermi sulilersinnaasut Aningaasaqarnermut Siunnersuisoqatigiit allapput.
AAMMA ATUARUK Aningaasaqarnermut Siunnersuisoqatigiit nalunaarusiami nutaami: Amerlavallaat aalisarnermi sulipput
Aamma ilinniartitaanermi unammilligassaqarpoq, taannalu siunnersuisoqatigiit arlaleriarlutik annerusumillu sammisareerpaat. Inuusuttullu ilinniagaqarpata nunatta karsianut qanoq isertitsissutaatigissanersoq siunnersuisoqatigiit maanna naatsorsorsimavaat.
- Inuusuttut 18-init 21-mut ukiullit 100-t ilinniakkamik ukiunik pingasunik missaannik sivisussusilimmik, soorlu assassortuusinnaapput imaluunniit allatigut kiffartuussinermut suliaqartuusinnaapput, naammassinnikkunik nunatta karsianut 140.000 koruunit missaannik isertitaqaataasinnaapput, Siunnersuisoqatigiit siulittaasuata tullia, Ulla Lynge, oqarpoq.
Ilinniarfiit tamaasa matumani eqqarsaatigisimagitsik, taassuma erseqqissaatigaa.
- Nunatsinni sulisinnaasut tamarluinnaasa amigaatigaagut atorfissaqartillugillu. Taamaammat ilinniarfiit sorlerpiaat tikkuartorneqanngillat, kisianni tamakkiisumik isiginninneruvoq. Ilinniarsimassuseq nunatsinni qaffannerusariaqarpoq, Ulla Lynge oqarpoq.
