Aningaasanut inatsit inissittoq: Partiit tamarmik isumaqataapput

Naalakkersuisut partiillu 2023-mut aningaasanut inatsit pillugu isumaqatigiinniarnitik naammassivaat.

Aningaasanut inatsisissatut isumaqatigiissut Aningaasaqarnermut naligiissitaanermullu Naalakkersuisup Naaja Nathanielsenip Namminersorlutik Oqartussani tusagassiortunik katersortitsinermi saqqummiutileruttorpaa.

Inatsisartuni partiit tamarmik isumaqatigiissuteqarput. Inuit Ataqatigiit, Siumut, Naleraq, Demokraatit Atassutillu aningaasanut inatsisissatut isumaqatigiissut tusagassiortunik katersortitsinermi atsiussavaat.

Partiit ukkatarisaat

- Piffissami artornartorsiorfimmi akisussaaqataaneq aningaasanut inatsimmi matumani qulequtaapput. Tamannalu partiit isumaqatigiissummi eqqorluaraat isumaqarpunga, IA-p siulittaasuata tullia, Agathe Fontain oqarpoq.

Ukrainemi sorsunnerup nunatsinnut sunniuteqarnera aningaasanut inatsimmi ukkatarineqarpoq.

- Ataatsimoortariaqarpugut. Akisussaaffeqarpugut, piffissallu aggersut pitsaanerpaamik ataatsimoorfigissavgut. Partiit allat oqaloqatigiilluarsimanitsinnut qujassuteqarfigerusuppagut. Aningaasanut inatsit una peqataaffigerusupparput, Aningaasaqarnermut Akileraartarnermullu ataatsimiititaliap siulittaasua, Hans Peter Poulsen (S) oqarpoq.

Demokraatiniilu aningaasanut inatsisip sinneqartooruteqarsinnaanera nuannaarutigineqarpoq.

- Aningaasanut inatsisip oqimaaqatigiittuunissaa piumasarisimallutigu nuannaarutigalugu oqaatigissavara. Tamanna imaappoq, ukioq manna sinneqartooruteqarpugut, aamma ukiunut sisamanut sinneqartooruteqarpugut, Demokraatit siulittaasuat, Jens-Frederik Nielsen oqarpoq.

Atassutip isumaqatigiissuteqaqataanini nuaannaarutigaa.

- Naak partiini minnerpaagaluarluta kiinneraarfigineqarluarnerput nuannaarutigaarput. Isumaqatigiissut una oqaluttuarisaanermi pingaarutilittut taaneqarsinnaangajappoq, partiimmi tamarmik isumaqatigiissuteqaqataapput, Atassutip siulittaasua, Aqqalu Jeremiassen oqarpoq.

Isumaqatigiissummi ukkatarineqartut sisamat

Aningaasanut inatsimmi ukkatarineqartut sisamaapput.

Ruslandip unioqqutitsisumik Ukrainemut saassussinera nunarsuarmi nunani aningaasat naleerukkiartulerneranik kinguneqarpoq. COVID-19-illu ukiuni arlalinni tuniluunnikuunerata kingunerani partiit ukuninnga annertuunik allannguinissamut qajannaaluarnerunissaat pingaaruteqarpoq.

Aningaasanut inatsisip utoqqaat pilersuisussanit amerlanerulernissaasa ajornartorsiutaanera aamma aaqqiiviginiarniarpaa. Ilaatigut ilinniartitaanermut suliffeqarnermullu politikkimut piumasaqaateqartoqassalluni, taamaalilluni suliassanik kivitsisinnaasoqassalluni.

Ukiuni arlalinni aningaasaliinerit annikippallaareernerata kingorna pisortat inissiaataannut attartortakkanut, umiarsualivinnut, mittarfinnut qulimiguullit mittarfiinut allanullu iluarsartuussinissamut aserfallatsaaliinissamullu aningaasaliisoqassaaq.

Kiisalu nunarsuarmi pitsaanngitsumik allanngortoqarnera soorlu inuussutissart nukissiuutillu akiisa qaffakkiartornerat annikillisinniarlugu nutaanik isertitanik pilersitsisoqassaaq.

Ukiut qulit tulleriit kinguaattoorutigineqartartoq

Aningaasanut inatsisissatut isumaqatigiinniarnerit ukioq manna kinguartoortutigineqaqqipput. Inatsit naapertorlugu aningaasanut inatsit novembarip ulluisa 15-ianni piareereersimasassaaq.

Naalli isumaqatigiissut piareereeraluartoq taanna Inatsisartuni novembarip ulluisa 21-anni aatsaat pingajussaaneerneqassaaq.

AAMMA ATUARUK Aningaasanut inatsisissaq ukiut qulissaat ataannartumik kinguaattoortoq

Aningaasanut inatsit ukiuni tulleriinni qulini kinguartoorutigineqarpoq.

Nutarterneqarpoq....