Aningaasanut inatsisissaq ukiut qulissaat ataannartumik kinguaattoortoq
Aningaasaqarnermut Ataatsimiititaliap sulinera pilersaarutaasumit sivisunerusariaqalernera kinguaattoornermut pissutaatinneqarpoq.
Aningaasaqarnermut ataatsimiititaliap siulittaasuata Naalakkersuisut apeqqutinut akissuteqarnerat utaqqisitsisuunerarpaa. Aningaasaqarnermulli Naalakkersuisup apeqqutit tamaasa akereernerarpai.
Inatsit ersarippoq. Tassani naqissuserneqarsimavoq aappaagumut aningaasanut inatsisissaq novemberip 15-iani piareeerneqareertassasoq.
Naalakkersuisut ukiumi ukioq aningaasanut inatsiseqarfiusoq sioqqullugu kingusinnerpaamik novembarip ulluisa 15- ianni inaarutaasumik akuersissuteqarnissaq siunertaralugu ukiumut aningaasanut inatsiseqarfiusumut tulliuttumut Inatsisartut aningaasanut inatsisissaattut siunnersuut saqqummiutissavaat.
Taamaattorli aamma ukioq manna nuna tamakkerlugu politikerit piffissaq eqqorlugu piareersisinnaanngillat. Maanna tagginneqarallarpoq sapaatip akunneranik kingusinaarluni piareerneqarumaartoq.
AAMMA ATUARUK Naaja Nathanielsen: Aningaasanut inatsisissami kikkut tamaasa nuannaartinneqarsinnaanngilat
Tamatuma malitsigisaanik Kommunit aammalu pisortat ingerlatsiviini suliffippassuit ingerlatsivippassuillu aappaagumut pilersaarutiminnik missingersuusiaminnillu naammassinninnissaminnut aamma sapaatip akunnerata missaanik kinguaattoortussanngorput.
Hans Peter Poulsen (S): Naalakkersuisut utaqqivagut
Ukioq manna kinguaattoortoqarnissaanut Aningaasaqarnermut Ataatsimiititaliap tungaanit nassuiaat tassaavoq ataatsimiititaliap apeqqutaanut Naalakkersuisut akissutissaat utaqqineqarmata:
- Apeqqutitsinnut akissutit Naalakkersuisunit takkussuuterusaarput, tassungalu tunngatillugu paasivarput piffissaliussat eqqorlugit isumaliutissiissutissarput naammassisinnaajunnaarlutigu. Taamaammat isumaqatigiippugut piffissaq sivisunerusoq atorlugu naammassiniartariaqarluta, Aningaasaqarnermut Ataatsimiititaliap siulittaasua, Hans Peter Poulsen (S) KNR-imut oqarpoq.
Naaja H. Nathanielsen (IA): Apeqqutit akereerpakka
Taamaattorli Aningaasaqarnermut Naalakkersuisoq Naaja H. Nathanielsen (IA) erseqqissaavoq ataatsimiititaliap apeqqutaanut akissutit kinguaattoorutigineqarsimanngitsut, allakkatigut imatut erseqqissaavoq:
- Killiffitsinni erseqqissaatigissavara Aningaasaqarnermut Ataatsimiititaliap apeqqutai tamakkerlugit akereernikuugakkit. Tamanna uppernarsiniarlugu Ataatsimiititaliap allattaa attavigivara naqissusersinnaavaralu apeqqutit tamaasa akereernikuugakkit. Immaqana paatsoortoqarsimasoq?
Taamak Naaja H. Nathanielsen ilaatigut akivoq, taassumalu innersuussutigaa Aningaasaqarnermut Ataatsimiititaliap apeqqutai septemberip 15-iani tigusimallugit taakkulu tamaasa oktoberip 14-iani akereersimallugit tamatumalu kingorna ataatsimiititaliamit apeqqutinik allanik tigusaqarsimanani.
Novemberip 21-iani inaarutaasumik naammassineqassangatinneqarpoq
Pilersaarutit malillugit aappassaaneerinninneq oktoberip 27-iani pisussaagaluarpoq, Aningaasaqarnermulli Ataatsimiititaliap qinnuteqarneratigut aappassaaneerinninneq 7. november aatsaat pisussanngorpoq.
Aningaasanut inatsisissap 2023-moortup pingajussaaneerneqarnissaa inaarutaasumillu taasissutigineqarnissaa novemberip 21-ianut ullulerneqarallarpoq, kingullermillu aningaasanut inatsit piffissaq eqqorlugu naammassineqarpoq 2013-mi.
