Aningaasanut inatsisissatut siunnersuut: Tunuliaqutit iluarinniinnanngillat
Siusinaartumik pensionisiallit, suliffissaaleqisut inuusuttunillu suliffissaaleqisoqarneranut, Naalakkersuisut iliuuseqarnerunissat, IA-p kissaatigigaluarpaa.
Demokratillu isumaqarput, Nunatta Ammerivianut tapiissutut peerneqartariaqartut, suliffeqarfik niuffannermi atukkat tunngaviglaugit siunissami ngerlalerniassammat.
- Isumaqarpunga, ukiumi qinersiviusussami aningaasartuutit isertitallu oqimaaqatigiinnisssaat eqqumaffigigamikkit, naalakkersuisoqatigiit tutsuiginassusermik takutitsisut. Aningaasaqarnikkut ukiorpassuit qaangiuppata aamma pitsaasumik inissisimanissarput qulakkeerniarlugu, sivisuumik suliasasaasut upannissaannut piareersimanitsinnut tamanna ersiutaavoq, IA-p aningaasaqarneq pillugu oqaaseqartartua, Naaja Nathanielsen oqarpoq.
Aningaasartuutigisassatut isertitassatulllu siunnersuutigineqartut oqimaaqatigiinerat, Demokraatit aningaasaqarnermut oqaaseqartartuata, Andreas Uldum -ip aamma iluarisimaarpaa.
- Oqimaaqatigiinnerat iluarisimaartorujuuarput.
Iluarisimaarinninnerli aamma killeqarpoq. Tassami inuiaqatigiinni sanngiinnerit ikiorniarlugit Naalakkersuisut iliuuseqarnerusinnaasut, IA isumaqarpoq.
- Tassa siusinaartumik pensionisiat, suliffissaaleqinerup akiorniarneqarnera inuusuttullu ilinnialersimanngitsut suliffeqanngitsullu pivagut. Taakkualu iliuuseqarfiginngikkutsigit, inuiaqatigiinni siunissami ungasinnerusumi naligiikkunnartoqariartuaartoqalersinnaavoq.
Kisianni aningaasaqarnermut inatsisissatut siunnersuumi takusinnaasoraara, atugassarititaasut tunngaviusut allangortinniarlugit Naalakkersuisut iliuuseqarniartut, Naaja Nathanielsen oqarpoq.
Andreas Uldumillu kissaatigigaluarpaa, Namminersorlutik Oqartussat suliffeqarfinnut imminut akilersinananngitsunut tapiissutaat pillugit Naalakkersuisut allaanerusumik iliussasut, Great Greenland taakkununnga ilanngullugu.
- Imminut akilersinaasunngorsaalluni pilersaaruteqarnissaq orninneqartariaqarpoq. Massakkummi aningaasarpassuit atortarpagut, taamakkaluartorlu takoreerparput, Great Greenland ingerlatsinermi siumut suli aallangitsoq, Andreas Uldum oqarpoq.
Kisianni tassa aappaagu qinersisoqassaaaq, Andreas Uldum aarleqqutigaa, aningaasanut inatsisissatut siunnersuut pillugu oqallinnerit tamatuminnga sunnersimaneqassasut, Inatsisartut isumaqatigiinngitsoornerannik kinguneqartumik.
- Qinersinissaq pivallaanngikkaluarlugu Nunarput pitsaanerpaamik ingerlanniarlugu, tamatta atatsimoorussatsinnik suliniutinik aalajangeeqatigiiffigisinnaassagipput, neriuutinni annerpaajuvoq, Andreas Uldum oqarpoq.
