Aningaasaliisartut Issittup uuliaanik qulluiumanngitsut
![](/sites/default/files/styles/image_934x467/public/article_images/olieboring_foto_statoil_arvid_steen.jpg?itok=aChZ5tkL)
Soraarnerussutisianut aningaasaateqarfiit aningaasaateqarfinnillu allanik aqutsisut, Danmarkimi suliffeqarfiit Danske Capital Skandialu taakkununnga ilaallutik, Issittumi uuliamik gassimik qalluisoqanngilluinnarnissaannik kissaateqarput. Internetikkut allaaserinnittartoq Investment & Pensions Europe taama ullumi allaaserisaqarpoq.
Issittup uuliasiorfiunanilu gassimik qalluiffiunnginnissaanut piffissaq nukingernartoq, aningaasaliisartut taakku oqaatigaat. Uuliasiortitseqatigiiffiit gassimillu qalluisartut Issittumi qalluilissagunik isumannaallisaaniarnermut malittarisassanik aningaasaliisartut taakku aamma saqqummiussaqarput.
Nunat assigiinngitsut uuliasiortitseqatigiiffinnut akuersissutinik tunniussisartut, akuersissutinik tunniussinnginnerminni silap pissusiata allanngoriartornerata akiorniarneqarnissaanut imminut pisussaaffilernikuunertik aamma eqqaamasariaqaraat aningaasaliisartut tikkuartorpaat, akuersissutinullu tunniunneqareersunut atatillugu malittarisassanik sukaterisoqarnissaa pisariaqarnerarlugu, akuersissutinillu tunniussiniaraanni suliniutinut aarlerinaateqarpallaanngitsunut taamaallaat tunniussisoqartarnissaa piumasaralugu.
Uuliasiortitseqatigiit gassimillu ujarlerlutik qillerisut Issittumi maanna suliniutitik unitsikkallassagaat aningaasaalisartut taakku piumasaraat, avatangiisillu immikkut mianerisassat misissuiffigineqannginnissaat aamma piumasaralugu.