Aningaasaliinermut inatsit nutaaq nalorninartorsiortitsisinnaasoq: isornartorsiuisut inatsit ilaannakortumik piareersimaneraraat
Nunatsinni aningaasaliinerit misissuinerillu pillugit inatsit sivisuumik utaqqineqarpoq.
Inatsisip nunanit allanit – tassunga danskit Savalimmiormiullu ilanngullugit – nunatsinni aningaasaliineranni peqquserluttoqannginnissaa imaluunniit kingunerluuteqannginnissaa qulakkiissavaa.
Inatsit Inatsisartuni novembarip aqqaneq-aappaanni siullermeerneqarneranut atatillugu KNR-ip inatsisissatut siunnersuut kalaallimut eqqartuussissuserisumut misissoqquaa.
Eqqartuussissuserisoq ilanngutassiami matumani kinaassutsiminik isertuussivoq. Aaqqissuisoqarfiup pineqartup kinaanera ilisimavaa.
Inatsit ersarinngippallaartoq, eqqartuussissuserisoq isumaqarpoq.
- Qanoq misissuisoqarlunilu nakkutilliisoqassanersoq, aamma avataanit (naleqqutinngitsumik aaqq.) aningaasaliisoqannginnissaa qulakkeeriniarnermi qanoq aaqqissuisoqassaneranik allassimasoqanngilaq, eqqartuussissuserisoq oqarpoq.
Christian Keldsen Sulisitsisuni pisortaq aamma taama inerniliissuteqarpoq.
- Erseqqissarneqanngitsut amerlavallaarput, immikkut akuersissusiisarnissaq nalunaarutinilluunniit pisariaqalersitsillutik, taanna oqarpoq.
Naalakkersuisunut pissaaneqarnerutitsisoq
Eqqartuussissuserisup oqarnera naapertorlugu inatsisissatut siunnersuummi oqartussatut, siunnersuisutut suliffeqarfittullu suut tunngavigineqarnissaat erseqqissaatigineqarnerat naammanngilaq.
Inatsilli piffissami kingusinnerusumi nalunaarutinik erseqqissaatigineqarsinnaasoq – tamannali qaqutiguinnaq pisartoq, eqqartuussissuserisup oqaatigaa.
- Misilittakkakka allat qivianngitsoorsinnaanngilakka, tassa Kalaallit Nunaanni inatsiserpassuit nalunaarutitigut naleqqussarneqarnissamut periarfissaqartartut, nalunaarutilli suliarineqanngisaannarlutik. Taamaalillunilu nukeriaretoqassanani.
Christian Keldsen Sulisitsisullu assingusumik isornartorsiuteqarput.
- Inatsisit aalisarnermut, takornariaqarnermut aamma aatsitassarsiornerup ilaanut tunngassuteqartut ukiuni kingullerni saqqummiunneqartut nukinngussaasarput, Christian Keldsen oqarpoq.
- Naliliisoqartussanngoraangat pissaanermik nikittoqartarpoq. Tassa pissaaneq Inatsisartuniittoq naalakkersuisunut akuersisinnaalerlutillu naaggaarsinnaalertunut nuunnneqassaaq.
Inatsit ilaannakortumik piareersimasoq
Inatsit eqqartuussissuserisumut ima ersarlutsigimmat taassuma taanna inatsimminngaanniit pilersaarummik nalunaarutaanerusutut taavaa.
- Ima paasillugu, inatsit qanoq atuutsinnedqassanersoq kinalu akisussaasuulluni oqartussaasuunersoq ataatsimut isiginnilluni aalajangersaasoqarsimavoq.
- Inatsimmili oqartussanut suliffeqarfinnulluunniit suut pivusumik tunngaveqartumik piumasaqaataanersut naammattumik allassimanngilaq.
Christian Keldsenillu inatsit ilaannakortumik piareersimasutut taavaa.
- Inatsit naammassineqanngilaq imaluunniit suli ajornerusumik immikkut akuerissutit naliliinerillu naalakkersuisoqarfimmit aalajangiiffigineqartussanngortinneqarpallaarput.
Eqqartuussissuserisup suliap qanoq suliarineqarnissaata, kikkut nakkutilliisuunissaata aamma suliffeqarfiit sunik tunngaveqarnissaasa paatsuunganartoqarneranut akisussaaffimmik naalakkersuisoqarfimmut tunniussisoqarpallaartoq nassuiaatigaa.
Tamannalu suliffeqarfinnut atorfilinnullu qularnermik pilersitsisinnaavoq.
- Naalakkersuisoqarfik uani qanoq suliaqarnissamut sinaakkuserneqanngikkuni suliamik isumaginninnermi iluarisarsiorpallaaleratarsinnaavoq. Suliffeqarfiit taama pineqarsinnaanngillat. Suliffeqarfiit qanoq sinaakkutaanniinnissartik suullu sinaakkutit avataaniitsitsissanersut ilisimasussaavaat, eqqartuussissuserisoq oqarpoq.
Naalakkersuisut suliamiit suliamut atatillugu nunap inissisimaneranut atatillugu qularnartunut aalajangiisinnaaniassagamik inatsisip paasiuminaannissaa ammasuunissaalu siunertarineqarsimasinnaava?
- Ilimaginngilara, eqqartuussissuserisoq oqarpoq.
- Oqartussat inatsisitigut akuerineqarsimasunik taamaallaat iliuuseqarsinnaanerat ajornartorsiutaavoq. Sinaakkutit iluanni ammatitsisoqarsinnaavoq. Kisianni suliffeqarfiit qanoq periarfissaqarnerlutik ilisimanngikkunikku qanoq ilillutit unitsinniarpigit?
Eqqartuussissuserisoq Christian Keldsenimit assingusumik isornartorsiuteqartumit taperserneqarpoq. Taassuma inatsisitigut qanoq inissisimasoqarnera ersarikkunnaassasoraa.
- Atorfilittatut suut tunngavigalugit akuersissuteqarnissaq imaluunniit itigartitsissuteqarnissaq ilisimanngikkaanni ajornakusoorluinnassaaq.
Aaqqiissutissamut aqqut
EU-mi Danmarkimilu aningaasaliisunik misissuinermut assingusunik inatsiseqarpoq.
Danmarkimi Inuussutissarsiornermut aqutsisoqarfik akisussaatinneqarpoq. Tamanna aqutsisoqarfiup CVR-inik nalunaarsuinermik aamma danskit kalaallillu suliffeqarfiinik nakkutilliinermik ingerlatsinerannik pissuteqarpoq.
Inatsimmi Inuussutissarsiornermi Aqutsisoqarfik suleqatigineqarniartoq inatsimmi ersarissumik allanneqaruni tamanna inatsimmut pitsanngorsaataassasoq eqqartuussissuserisup oqaatigaa.
Aamma naalakkersuisut akisussaatinneqaannaratik Inuussutissarsiornermut Naalakkersuisoqarfiup oqartussaasuutinneqarnissaa siunnersuutigineqarpoq.
- Taava naalakkersuisoqarfik tassunga isumalluutissaqarnersoq apeqqutaaginnarpoq, eqqartuussissuserisoq oqarpoq.
- Nunatsinni ingerlatseqatigiiffinnik nalunaarsuineq tamarmi Inuussutissarsiornermut aqutsisoqarfiup nalunaarsuiffia aqqutigissappagu, aningaasaliissutit pillugit paasissutissanik Kalallit Nunaat qanoq pissarsitigisinnaaanersoq ernumanartissinnaavara.
Christian Keldsenip naggasiutigalugu Namminersorlutik Oqartussat Inatsisartut inatsimmik akuersitinnagit piffissamik atuinerusarnissaat kaammattuutigaa.
- Inatsigut ilaannikkut sivisunerusumik suliarineqaqqaartarsinnaapput. Inatsisiliornermi suliat naammassinngikkutsigit inatsisit ersarluppallaalissapput.
KNR-ip ilanngutassiami matumani isornartorsiutit Inuussutissarsiornermut, Aatsitassanut, Nukissiuutinut, Inatsiseqarnermut Naligiissitaanermullu Naalakkersuisumut, Naaja Nathanielsenimut saqqummiuppai. Akissutaa ilanngutassiarineqartussami saqqummiunneqassaaq.
