Aningaasaatilissuit Notre Damep sanaqqinnissaanut millionerpassuarnik tunissuteqartut
Oqaluffissaarsuup sanaqqinneqarnissaa Frankrigimi naalakkersuisut sulissutiginiaraat Frankrigip præsidentiata Emmanuel Macronip nalunaarutigereeraalu sanaqqinneqarnissaanut aningaasaliiniat arlallit nalunaarput.
Bernard Arnault, suliffeqarfinnik assigiinngitsunik piginnittoq, 200 millionit Euronik, tassa 1,5 milliardit koruunit missaannik aningaasaliiniarpoq, aningaasaatilissuarlu alla Francois Pinault, 100 millionit Euronik, tassa 746 millionit koruunit missaannik aningaasaliiniarluni.
AAMMA ATUARUK Parisimi oqaluffissuaq Notre Dame ikuallattoq
Oqaluffissaarsuarmi Notre Dame-imi ikuallattoqartoq Parisimi ippassaq unnukkut nalunaaqutaq arfineq-marlunngulersoq kalerriutigineqarpoq, Frankrigillu præsidentiata Macronip killitsisimaarpasilluni oqaatigaa oqaluffissaarsuaq sanaqqinneqarumaartoq. Aningaasaliiniartut siulliit taassuma kingorna nalunaarput.
Nunat EU-mi ilaasortat 28-t oqaluffissaarsuup sanaqqinneqarnissaanut suleqataanissaat, EU-p præsidentiata Donald Tuskip kaammattuutigaa.
Oqaluffissaarsuup ilarujussua ikuallattoqarnerani nakkaappoq, oqaluffissaarsuarlu ukiunik 850-inik pisoqaatigisoq qanoq ililluni ikuallalersimanersoq suli ilisimaneqanngilaq. Oqaluffissaarsuarli iluarsaanneqaleruttormat, iluarsaassinermut atatillugu ikuallattoortoqalersimanissaa ilimagineqarluni.
/ritzau/