Aningaasaateqarfik sukkorneq pillugu Nuummi sullissiviliorusuttoq
Aningaasaateqarfik Novo Nordisk Fonden sukkorneq inooriaaserlu pillugit Nuummi sullissiviliorniarpoq.
Sullissivik Steno Diabetes Center Grønlandimik taaguuteqassaaq, nunatsinnilu sukkorneq inooriaaserlu pillugit periusissat nukittorsarnissaat anguniarneqarpoq.
Suliniut Naalakkersuisut aningaasateqarfiullu Novo Nordisk Fondip suleqatigiissutigaat, taakku anguniagassatut takorluugaq akuersissutigeqqammerapaat. 2020-llu tungaanut suliniummut pilersaarusiortoqassaaq, aningaasaateqarfiullu siulersuisui suliniummut aningaasaliinissamut inaarutaasumik aalajangiinnginnerini pilersaarut illuatungeriinnit akuerineqaqqaartussaalluni.
AAMMA ATUARUK Genip immikkuullarissup kalaallit sukkulersittarpai
- Sukkornermik tamatumunngalu attuumassutilinnik nappaatinik inooriaatsimik patsiseqartunik nakorsaanermik, ilisimatusarnermik, pitsaaliuinermik ilinniartitaanermillu nunatsinni innuttasunut iluaqutaasussamik kivitsisuunissaa suliniummi nutaami anguniagaraarput, Lars Rebien Sørensen, aningaasaateqarfiup Novo Nordisk Fondip siulersuisuini siulittaasoq oqarpoq.
Sukkortunik sullissivittaassaq Nuummi Dronning Ingridiup Napparsimmavissuanut qanittumi sananeqassaaq, tassanilu nakorsartinnissamut neqeroorutinik, siusissukkut paasiniaanermik, pitsaaliuinermik suliaqartoqassaaq kiisalu nappaateqartunik peqqinnissakkullu sullissisunik ilinniartitsisoqassalluni.
AAMMA ATUARUK Sukkorneq glutenitalinnik nerisaqarnermik pissuteqarsinnaavoq
Inooriaatsimut tunngatillugu iliuuseqarnermi nukittorsagassat tassaapput sukkorneq, anigugassaanngitsumik pualluuteqarneq (KOL) aamma uummatikkut taqqatigullu nappaateqarneq.
Misissuinerup takutippaa kalaallit quliugaangata ataaseq pallillugu sukkornermik type 2-mik nappaateqartoq, tallimaagaangatalu ataaseq sukkornermik type 2-mik nappaateqalersinnaanermut ersiuteqartartoq.