Angutit pinngitsaaliinermut tunngatillugu suliami iperagaasut
Politiit angutit marluk Aarhusimi sapaatip akunnerata naanerani pinngitsaaliinermut tunngatillugu suliami tigusarineqartut iperarniarlugit aalajangerpaat. Østjyllandip Politiivi taama paasissutissiissuteqarput.
Suliami pinerlineqartoq tassaavoq arnaq 37-nik ukiulik nunatsinnullu attuumassuteqartoq.
Angutit marluk angut alla peqatigalugu kattussilluni pinngitsaaliisoqarneranik nalunaarutiginnittoqarnerata kingorna arfininngormat tigusarineqarput.
Angutit inatsit tunngaviusoq naapertorlugu sapaatiummat killisiorneqarput, tassanilu angutit pingasut tigummigallarneqarnissaat aalajangerneqarluni.
Tamanit ikiorneqarnissamik piumasaqartut
Østjyllandip Politiivi suliami pinerlineqartumut Aarhusimi Langenæs Allémi nalunaaqutaq ualikkut ataatsip missaani attaveqarsimasunik sisamanngormat ilisimannittussarsiorput.
Politiit angut qaqortunik biilertoq arnamik oqaloqateqarsimasoq pingaartumik attaveqarfigerusuppaat.
Angutillu marluk meeqqamik arsaqateqartut aamma ujarneqarlutik.
Politiit suliamut atatillugu allanik tigusarinnittoqarsinnaanera mattutinngilaat.
