Angutit marluk ujajaanerup toqutseriarnerullu kingorna tigummigallagassanngortinneqartut

Angutit marluk – 23-nik aamma 42-nik ukiullit Nuummi marlunngornermi unnukkut tigusarineqarput.

Taakku ujajaasimasutut toqutseriarsimasutullu maanna pasineqartut, Kalaallit Nunaanni Politiit tusagassiuutinut paasissutissiipput.

Angutit marluk tigusarineqannginnerminni Kongevejimi Brugseneeqqamut ujajaapput immiaaqqallu karsit marluk tillillugit. Tamatuma saniatigut pisiniarfimmi sulisut immiaaqqanik milloorpaat, illoqarfimmilu sumiiffimmi allami inuk ataaseq naavatigut savimmik kapillugu.

Pasineqartut marluk Eqqartuussisoqarfik Sermersuumi ippassaq ualikkut sassartinneqarput, eqqartuussisullu angutit taakku marluk politiit suliamik misissuineranni ulluni 28-ni tigummigallagassanngortinneqassasut aalajangerpaa.

Eqqartuussivimmi sassartitsineq matut matoqqatillugit ingerlanneqarpoq.

Angut inuusuttoq nammineerluni nassueriartortoq

Politiit pasineqartut pingajuat ippassaq unnukkut nassaaraat, taanna ujajaasimasutut toqutseriarsimasutullu aamma pasineqarpoq. Tassani angut 21-nik ukiulik pineqartoq, tusagassiuutinut nalunaarummi allassimavoq.

Ullumilu ullaap tungaani pasineqartut sisamaat nammineerluni politiinut nassuerutiginnikkiartorpoq. Tassani angut 21-nik ukiulik aamma pineqarpoq, taanna ujajaasimasutut toqutseriarsimasutullu aamma pasineqassaaq.

21-nik ukiullit marluk Eqqartuussisoqarfik Sermersuumi ullup ingerlanerani sassartinneqassasut politiit nalunaarutigaat.

Suliamut attuumassuteqartunik paasissutissaateqaruit politiinut oqarasuaammut 70 14 48-mut attaveqarsinnaavutit.