Ujajaanermut toqutseriarnermullu ilisimannittut ujaarineqarput

Naqqiut: Ujajaaneq Brugsenimi pisimasoq allakkaluarparput, tamanna eqqortuunngilaq. Taassuma ungasinngisaani Brugseneeqqami ujajaaneq pivoq. 

Nuummi Politiit ataasinngornermi unnukkut ulapaarsimaqisut Brugseneeqqami Tuujummiittumi ujajaanermi takunnissimasunik, illoqarfimmilu toqutseriarnertut ilimatsaanneqartumut takunnissimasunik ujaasipput.

Angutit sisamat ippassaq unnukkut nalunaaqutaq 21:49 Nuummi Brugseneeqqamut isersimasut nalunaarutigineqartut, politiit pigaartuisa pisortaat Carl Sværd paasissutissiivoq. 

Angutit taakku sisamat immiaaqqanik karsinik tigusereerlutik aniartornerminni sulisumit unitsinniarneqartillutik puiaasaaqqanik sulisunut milloorsimapput. 

- Ataaseq igalaaminernik eqqorneqarpoq, politiit pigaartuisa pisortaat KNR-imut oqarpoq.

Angutit pineqartut sisamat Brugseneeqqamiit qimaapput, kingornali marluk politiinit nassaarineqarput tigusarineqarlutillu. 

- Pisoq eqqarsaatigissagaanni sulisut ajunngitsutut oqaatigineqarsinnaapput, politiit pigaartuisa pisortaat paasissutissiivoq.

Toqutseriarneq

Nalunaaqutaq 23:16 Nuummi politiit nalunaarummik allamik kalerrinneqarput. Nuummi inisimaffiit ilaata eqqaani aqqusinermi perulluliortoqarnera nalunaarutigineqarluni. 

Politiit pisoqarfimmut apuunnerminnni paasivaat inuk ataaseq savimmik kapineqarsimasoq. 

- Immaqa aamma kaatamik anaaneqarsimavoq, Carl Sværd oqarpoq.

Pinerlineqartup maanna qanoq innera politiit ilisimanngilaat, sulilu misissuisoqarmat suliamut tunngasumik annertunerusumik oqaaseqarsinnaanngillat. 

Inuk ataaseq tassani najugalik suliamut tunngatillugu tigusarineqarpoq. 

Ippassaq unnukkut ujajaanermut tunngasumik aamma toqutseriarnermut tunngasumik ilisimannittut takunnissimasulluunniit, Nuummi politiinut sianernissamut kaammattorneqarput, politiit unnga sianerfigineqarsinnaapput 70 14 48.