Politiit ullormut nalunaarusiaat: Angutit marluk sapaatit akunnerata naanerani nakuusertoqareernerani tigusaapput
Angut angutinit marlunnit arfininngormat unnukkut saassunneqarpoq. Tamannalu sapaatit akunnerata naanerani pisunik suliaanni sakkortunerpaasoq, Kalaallit Nunaanni Politiit pigaartuisa pisortaat Bjørn Bjerregaard ataasinngornermi ilisimatitsivoq.
Angutit marluk, tamarmik 20-t sinnerlugit ukiullit, angummut Nuup ilaani Nuussuarmi Akikip eqqaani isimmittaallutik tilluaallutillu saassussisimasut, politiit ilisimatitsipput.
- Angutit marluk taakku tigusaareerput, aamma Eqqartuussisoqarfik Sermersuumi sapaatiummat killisiorneqareerlutik septembarip 29-ata tungaanut tigummigallagassanngortitaapput, Bjørn Bjerregaard oqarpoq.
Suliaq taanna paasiniaasartuminnut ingerlateqqereeritsik eqqartuussivimmilu suliarineqassasoq, politiit pigaartuisa pisortaat oqarpoq.
Taamaammat suliaq taanna pillugu oqaaseqaqqissinnaanani, taanna oqarpoq paasiniaasartorisamillu ilaannut Malik Sandgrenimut innersuulluta.
Malik Sandgren oqaloqatiginiarsimagaluarparput, taannali pisinnaasimanani. Taamaammat saassunneqarsimasoq qanoq innersoq paasinngilarput.
Angerlarsimaffinni eqqissiviilliornerit, aqqusinermi perulluliornerit aalakoorlutillu biilertut
Nuummi nakuusertoqarsimanerata saniatigut pisut ilarpaalui imigassartorsimanermik aallaaveqartut, politiit pigaartuisa pisortaat oqarpoq.
- Pisut imigassartorsimanermik aallaavillit ulapputigisatsinnut aamma ilaapput. Taakkua ilaatigut angerlarsimaffinni eqqissiviilliornermut, aqqusinermi perulluliornermut aalakoorlunilu biilernermut tunngasuupput, pisulli taakku arlaannaalluunniit unnerluutiginninnermik kinguneqanngillat, taanna oqarpoq.
Inuit akissarserrannikuugaluartut akileraarutinillu utertoorutisinikuugaluartut sineriammi sumiiffiiit allat qujanartumik ulapaarfiusimanngitsut, politiit pigaartuisa pisortaat oqarpoq.
