Angutit marluk hashimik nunatsinnut anngiortumik eqqusseriaraluartutut tigusat iperagaasut
Angutit marluk hashimik nunatsinnut anngiortumik eqqusseriaraluartutut tallimanngormat tigusaapput.
Angutip aappaa Kangerlussuarmi tigusaavoq, aappaalu Aasianni tigusaalluni. Angutit marluk taakku hashimik timiminiititaqarlutik, tassa iiorarsimasaminnik nunatsinnut anngiortumik eqqusseriaraluartutut tigusaasut, Kalaallit Nunaanni Politiit pigaartuisa pisortaat Malik Olesen oqarpoq.
Angutit marluk taakku Eqqartuussisoqarfik Sermersuumi arfininngormat sassartitaapput.
Sassartitaareeramilli iperagaasut, politiit pigaartuisa pisortaat oqarpoq.
- Angutit marluk taakku sassartitaareeramik iperagaapput, sulianili assingusuni siornatigut taama pisoqarnikuunngimmat iperagaanerat nutaajuvoq, Malik Olesen oqarpoq.
Ikiaroornartumik iiorarsimasamik anngiortumik eqqusseriaraluartut imaaginnavittut
Ikiaroornartoq pillugu inatsimmik unioqqutitsisutut politiit siorna nalunaarsugaat 584-iupput. Ukiunilu kingullerni 20-ni nalunaarsukkat taamaattut aatsaat taama amerlatigipput.
Ikiaroornartumik nunatsinnut anngiortumik eqqusseriaraluartutut 2022-mi tigusat ukiup siulianinngarnit pingasoriaammik amerlanerupput. Taakkunannga amerlanerpaartaat angutit marluk sapaatit akunnerata naanerani tigusaasutilli hashimik nunatsinnut anngiortumik eqqusseriaraluartutut tigusaapput.
Angut alla Qaqortumi siorna oktobarip 20-ani toquvoq. Angut taanna hashimik poortukkamik iioraasimavoq, iiorarsimasaalu erlaviani katersuuttoorsimammata timimigullu aseruuttoorluni toquvoq.
Angut taanna hashimik poortukkamik iioraasimanermik ukiup affaata ingerlanerani toqquteqartut pingajoraat, taamaaliornermillu siorna toqquteqartut katillutik pingasuupput.
Politiit oqarnerat naapertorlugu ikiaroornartumik iioraasimasutut 2022-mi tigusat 62-iupput. Politiilli kisitsisaataat suliani taamaallaat kisitsinerneersuummata, taakku nalunaarsorneqarsimanngitsoqarataannaapput.
Ikiaroornartumik iioraanermik 2023-mi toqquteqartoqanngilaq, kisianni angut hashimik mikisuaqqanik 100-nngorlugu poortukkamik iioraasimasoq Kangerlussuarmi januaarip 30-ani tigusarineqarpoq.
