Angutit tigusarineqartut: Hashimik eqqusseriartutut pasineqarput
Inuit marluk Danmarkimiit timmisartumik tikittut ippassaq tigusarineqarput.
Kalaallit Nunaanni politiit pigaartuisa pisortaat Malik Olesen taama KNR-mut oqarpoq.
Pineqartullu tassaapput angutit inersimasut marluk, pigaartoq ilisimatitsivoq.
Taassuma oqaatigisinnaanngikkallarpaa angutit taakku marluk qassinik ukioqarnersut imaluunniit suliat taakku marluk imminnut attuumassuteqarnersut.
Hashiuvoq
Angutip aappaa Kangerlussuarmi ullaap tungaani tigusarineqarpoq, tamatumalu kingorna Nuummut ingerlateqqinneqarpoq. Aappaalu nalunaaqutaq marlup eqqaani Aasianni tigusarineqarpoq.
Angutit taakku marluk ikiaroornartumik qanoq annertutigisumik eqqusseriarsimanersut suli ilisimaneqanngilaq.
- Oqaatigissallugu suli siusippallaarpoq, Malik Olesen oqarpoq nangipporlu:
- Massakkuugallartorlu oqaatisinnaavarput, matumani hashi pineqarmat.
Angutip aappaa Nuummi arfininngornermi ualikkut inatsit tunngaviusoq malillugu killisiorneqassaaq, maannalu politiinit tigummineqarpoq. Aappaalu ullup ingerlanerani kingusinnerulaartukkut aamma sassartinneqassalluni.
