Angutit assammik arsartartut ilungersoraluaqalutik pingasoriarlutik ajorsarput

Nunatsinni assammik arsaannermi nunanut allanut unammisartut ulluni kingullerni pingasuni ikinngutigiittut Nuummi unammisaqattaaramik pingasoriarlutik unammigamik pingasoriarlutik ajorsarput.

Nunanut allanut unammisartut qallunaat U21-t nunanut allanut unammisartuinut ullumi unamminerminni 25-23-mik ajorsarput. nikinnermi kalaallit 10-9-mik siuaqqagaluarput, unamminerilli immikkoortuata aappaani qallunaat timikkut nukittunertik pissutigalugu ajugaallutik.

Ikinngutigiittut pingasoriarluni unammisaqattaarnermi, kalaallit aappassaanik naligiinnerusumik angusaqarput.

Tamannalu ajunngeqisoq, nunanut allanut unammisartut sungiusaasuannut ikiortip Ingi Olsenip oqaatigaa.

- Tamanna ajunngeqaaq. Tassami kikkut ilungersornerusimanersut naatsorsorsinnaagaanni tamanna qularutissaanngilaq. Isumaqarpunga qallunaat kalaallinut unammisartunut ataqqinninnerulersimassasut, Ingi Olsen oqarpoq.

Unammineq siulleq sisamanngormat pivoq. Kalaallit Nunaat tassani aamma ajorsalaarpoq. Qallunaat 28-26-mik ajugaapput, naak Kalaallit Nunaat nikinnermi 15-11-mik siuaqqagaluartoq.

Unamminerit aappaat ippassaq pivoq.  Tassani qallunaat 34-26-mik ajugaallualaavipput.  Unamminermi kalaallini Minik Dahl Høegh isertitsinersaalluni qulingiluanik isertitsivoq. Ullumi unamminermi aamma taanna arfinilinnik isertitsilluni isertitsinersaavoq.