Angut toqutsisimasutut ilaatigut unnerluutigineqartoq
Arnap kiinnamigut savimmik kilerneqarnera qungatsimigullu siorna maajimi kapineqarnera Unnerluussut naapertorlugu kingunipiloqarpoq.
Unnerluussissut naapertorlugu arnap pisumi sualuttumik ikilernernini unnukkut kingusinnerusukkut toqqutigai.
Angutip 28-nik ukiullip pisup kingorna toqutsisutut pasineqartup eqqartuussivimmi ulluni arlalinni unnerluutigineqarnissaa ullumi aallartinneqarpoq. Unnerluussisussaatitaasut piumasaqaataat isumaqatigineqassappat angut ukiuni arfineq-pingasuni pineqaatissinneqarsimasunut inissiisarfimmiittussanngortinneqarsinnaavoq.
Unnerluussissut naapertorlugu illumi pisoqarfiusumi meeraqarsimavoq, meeqqat piffimmiit qimaallutik politiinut kalerriisimapput. Angut pisup kingorna piffimmiit aamma qimaasimanerarneqarpoq.
Toqutsinerinnaanngitsoq
Angut toqutsisimasutut unnerluutigineqarnermi saniatigut hashimik arlaleriarluni tigummiaqarsimasutut, Nuussuarmi Akikimi ilaatigut nakkutilliisumut nakuusersimasutut aamma inissiami pisattanik aserorterisimasutut unnerluutigineqarpoq.
Angutip nillataartitsivimmi ilisiviit arlallit, fjernsyni, inissiamut isaariami silarlermi matserfik ilaatigut aserorsimavai.
28-nik ukiullip eqqartuussivimmi unnerluutigineqarnera ullumi aqagu kiisalu sapaatip akunnerata tulliani ulluni marlunni suliarineqassaaq.
