Angut toqutseriarsimasutut eqqartuunneqartoq

Angut 27-nik ukiulik toqutseriarsimasutut Eqqartuussisoqarfik Sermersuumi sapaatip akunnerani matumani unnerluutigineqarpoq.

Angut angummik allamik savimmik aqqanileriarluni kapisisimasutut puaanillu pullaarnermik kinguneqartitsinermi toqutseriarsimasutut unnerluutigineqarpoq.

Tamanna angutip 27-nik ukiulimmit unnerluutigineqartumit hashimik arsaarinneriarnerani juulip ulluisa pingajuanni unnukkut pivoq.

Savik imminut illersornermut atorneqartoq

Ulluni marlunni eqqartuussisoqareersorlu 27-nik ukiulik toqutseriarnermi pisuusoq eqqartuussivik aamma isumaqarpoq. Taamaammallu angut piumasaqaatitaqanngitsumik ukiuni sisamani pinerluuteqarsimasunut inissiisarfimmiittussanngortippaa. Taama pineqaatissiisoqarnissaa unnerluussisussaatitaasup piumasaqaatigaa.

Aamma naak unnerluutigineqartup savik imminut illersorniarluni atorsimallugu pinerlineqartumillu toqutseriarsimanani nassuiaatigigaluaraa. Taamaammat angutip eqqartuussut ingerlateqqinneqartussanngortippaa.

Unnerluussisussaatitaasulli eqqartuussut naammagisimaarpaa.

- Suliaq ilungersunarluinnartuuvoq, politiimmi ikiueqqaarnermik suliaqarsimanngikkaluarpata angut toqusimasinnaagaluarpoq.

- Taamaammat unnerluussisussaatitaasunit eqqartuussiviup piumasaqaatigisatsitulli eqqartuussuteqarnera naammagisimaarluinnarparput.

- Eqqartuussiviup aalajangiinermini politiinit uppernarsaasiinermik pingaartitsinera unnerluutigineqartorlu pinerlineqartumik toqutsinissaminik siunertaqarsimasoq isumaqarnera pingaartumik naammagisimaarparput, unnerluussisussaatitaasoq, Brian Viholt eqqartuussuteqarnerup kingorna oqarpoq.

Toqutseriarnermi pinngitsuutitsisoqartikkusukkaat

Unnerluussisussaatitaasup Eqqartuussisoqarfik Sermersuullu isumaqarnerata muminganik – unnerluutigineqartup illersuisuatalu toqutseriarnermi pinngitsuutitsisoqarnissaa nakuusernermilu kisimi eqqartuussisoqarnissaa kissaatigaat.

Unnerluutigineqartup suliamik ingerlatitseqqitassanngortitsinerat pissutigalugu unnerluussisussaatitaasut eqqartuussummik sukannernerulersinneqarnissaa imaluunniit attassiinnartoqarnissaa pillugu ingerlatitseqqinniarnermi akissutigaa. Taamaammat suliaq naammassineqartutut isiginngilaa.

- Ingerlatitseqqittoqarnera pissutigalugu suliaq eqqartuussivimmit eqqartuussisoqarneratigut naammassineqanngitsoq erseqqissassallugu pingaaruteqarpoq. Suliaq Nunatta Eqqartuussisuuneqarfiani qanoq aalajangerneqarumaarnera soorunami takussavarput, Brian Viholt oqarpoq.

Suliaq Nunatta Eqqartuussisuuneqarfiani suliarineqartussanngornissaata tungaanut unnerluutigineqartoq tigummigallarneqarallaannassaaq.