Angutip nakuuserneq nassuerutigaa toqutseriarsimannginnerarlunili
Angut 27-nik ukiulik Nuussuarmi siorna juulimi ataasinngornermi unnukkut toqutseriarsimasutut Eqqartuussisoqarfik Sermersuumi sapaatip akunnerani matumani unnerluutigineqarpoq.
Angut angummut allamut savimmik aqqanileriarluni kapisisimanini pissutigalugu toqutseriarsimasutut unnerluutigineqartoq suliami unnerluussummi allassimavoq.
Angut toqutseriarsimannginnerarpoq, nakuusernerli nassuerutigalugu. Angut taanna siorna juulimi ataasinngornermi pisoq pillugu ullumi unnerluutigineqarluni nassuiaateqartinneqarpoq.
Kina eqqortumik oqaluppa?
Angut unnerluuutigineqartoq mikisunik iseqarpoq, kakkivissamigut naatsunik umeqarluni. Takkajaanik qernertunik nujaqarpoq pukusuni tikillugu.
Suliami hashi nakuusernerlu qitiupput, suliamimi pinerlineqartoq unnerluutigineqartumit hashi tiguniarsimavaa.
Juulilli pingajuani unnukkut susoqarsimanera kia nassuiaateqarnera apeqqutaavoq.
Angutip unnerluutigineqartup 27-nik ukiullip eqqartuussivimmi nassuiaateqarnermini oqarpoq, angut pineqarlineqartoq 27-nik ukiullup angerlarsimaffianukarsimasoq, ikiaroornaartuutaanillu arsaarniarsimallugu, tassanilu perulluliorneq aallartittoq.
Pinerlineqartup nassuiaateqarnermini oqaluttuaraa, angut 27-nik ukiulik najugaqarfimminit tuniniaasoq takugamiuk tuniniagaasa tiguniarnerini perulluliorneq silami aallartissimasoq.
- Kisianni angerlarsimaffinnut nutsullunga eqquppaanga kapuulerlungalu, pinerlineqartoq nassuiaateqarnermini nassuiaavoq.
Unnerluutigineqartulli imminut illersorniarluni savik atorsimallugu nassuiaateqarpoq toqutseriarsimannginnerarlunilu.
Ukioq ataaseq sisamalluunniit?
Angut inuusuttoq pinerlineqartoq nakuuserfigineqarnermi kingorna ataavartumik ajoquserpoq, Dronning Ingridip Napparsimmavissuanilu nakorsap eqqartuussivimmi aamma nassuiaateqartup oqarnera naapertorlugu angut taanna savimmik kapoorneqarnermini inuunerminik navianartorsiorsimavoq.
- Puamigut, qungatsimigut naamigullu kapineqarnini pissutigalugu inuunerminik navianartorsiorsimasoraara, nakorsaq ilisimannittutut nassuiaateqarnermini oqarpoq.
Politeeq aamma nassuiaateqarpoq, taassuma pinerlineqartoq kapoorneqarnermi kingorna aangaatsiarsimasoq oqaatigaa.
- Isigalunga toqorusunnani oqarfigaanga, isaalu immatsersimapput, politeeq eqqartuussivimmi oqarpoq.
Eqqartuussivimmi suliaq aqagu nanginneqaqqissaaq, tassanilu ilisimannittut marluk nassuiaateqassallutik. Taakkunannga ataaseq qitiusumik inissisimatinneqarpoq, taanna ullumikkut takkuttussaagaluarpoq, imigassarli pissutigalugu takkunnani.
27-nik ukiullip eqqartuussinerup aallartinnerani nakuusersisimanini nassuerutigimmagu illersuisuata toqutseriarsimasutut pinngitsuutinneqarnissaa piumasaraa, nakuusernermilu ukioq ataaseq pinerluuteqarsimasunut inissiisarfimmiitinneqarnissaa piumasaralugu. Unnerluussisussaatitaasulli toqutseriarsimasutut ukiuni sisamani pinerluuteqarsimasunut inissiisarfimmiititsisoqarnissaa piumasaralugu.
