Angut toqungasoq Tasiilami nassaarineqartoq: Toqutsisoqarsimaneratut misissuisoqartoq
![](/sites/default/files/styles/image_934x467/public/article_images/politi-tasiilaq.jpg?itok=UipMgsmK)
Tasiilami angutip inissiat ilaanni angut 48-nik ukiullip toqungasup nassaarineqarsimanera pillugu, Kalaallit Nunaanni Politiit ataasinngornermi januaarip ulluisa pingajuanni ualikkut nalunaaqutaq tallimat qaangerlugit tanneq marluk kalerrinneqarput.
Politiit inissiamut pineqartumut ornigupput. Paasissutissallu inissiami tassani katersorneqartut aallaavigalugit pisimasoq toqutsisoqarsimaneratut misissuiffigineqassasoq, politiit apuunnerminni aalajangerpaat.
Angut 48-nik ukiulik toqungasoq nassaarineqarpoq. Arnaq 41-nik ukiulik suliamut atatillugu tigusarineqarpoq pasineqarlunilu. Toqungasoq tigusarineqartorlu qanigisariipput.
Danmarkimit ikiorneqassapput
Kalaallit Nunaanni Politiit suliamut atatillugu misissuileruttorput, misissuisartunillu Danmarkimeersunit ikiorneqassallutik.
Arnaq 41-nik ukiulik inatsit tunngaviusoq naapertorlugu killisiorneqassanersoq, misissuinerit siulliit takutikkumaarpaat.
Kalaallit Nunaanni Politiit suliamut atatillugu itinerusumik oqaaseqarsinnaanngikkallarput, ilaqutaasullu ilisimatinneqareerlutik.