Angut pinngitsaaliinerit marluk pillugit paarineqatussanngortinneqartoq

Angut 23-nik ukulik Nuummi Eqqartuussisoqarfik Sermersuumi unnerluutigineqarpoq. Taanna nakuusersimasutut, tillinniarsimasutut pissutsinilu marlunni pinngitsaaliisimasutut unnerluutigineqarpoq.

Angut pissutsini pingasuni tamani eqqartuunneqarpoq, tarnikkullu qanoq issusianik misissuineq tunngavigalugu paarineqartussanngortinneqarluni pineqaatissinneqarluni eqqartuunneqarpoq.

Kalaallit Nunaanni Politiit tusagassiuutinut nalunaarummi allapput.

23-nik ukiulik Nuummi meeqqat angerlarsimaffiannut siorna maajimi isersimavoq, tassanilu niviarsiaraq aqqanilinnik milutsillugu pinngitsaalivaa, pinngitsaalillugulu atoqatiginiarsimallugu.

Niviarsiaqqap sulisut nillialluni itertippai, angullu tamatuma kingorna sapilersinneqarpoq, politiillu takkunnissaata tungaanut tigummigallarneqarluni.

Angut tamatuma kingorna Eqqartuussisoqarfik Sermersuumi sassartinneqarpoq, angutillu tigummigallarneqarnissaa aalajangerneqarluni.

Tigummigallarneqarnermini angummik pinngitsaaliisoq

Angutip angut 61-inik ukiulik, tigummigallarneqarallarfimmeeqatigisani pinngitsaalillugu milutsippaa. Tamatumalu kingorna pinngitsaalillugu atoqatigeriaraluarlugu.

Angut taakku saniatigut nakuusersimasutut, tillinniarsimasutut, inissiisarfimmiittumullu allamut inerteqqutaasumik pinngitsaaliisimasutut aamma eqqartuunneqarpoq.

- Angut siusinnerusukkut pinngitsaaleeriarsimasutut eqqartuunneqareernikuuvoq, maannalu marlunnik allanik pinngitsaaliisimasutut eqqartuunneqarluni. Angut taamaalilluni uanga paasinninnera naapertorlugu inuiaqatigiinni innuttaasunut ulorianaateqarluni, taamaattumik eqqartuussiviup suliami aalajangiinera ilorrisimaarutigilluinnarpara, unnerluussisussaatitaasoq, Gutti Harryson tusagassiuutinut nalunaarummi oqarpoq.

Angutip niviarsiaqqamut aqqanilinnik ukiulimmik pinngitsaaliisimasutut eqqartuusut akueraa, angummillu 61-inik ukiulimmik pinngitsaaliinermut tillinniarnermullu tunngatillugu aalajangiineq suliarineqaqqittussanngortillugu.