Qitornani pinngitsaalisimagaa: Angut pineqaatissinneqarsimasunut ukiuni pingasuni inissiisarfimmiittussanngortitaasoq
Pineqaatissinneqarsimasunut ukiuni pingasuni inissiisarfimmiissaaq.
Qaasuitsup eqqartuussisoqarfia Ilulissaniittoq taama aalajangerpoq.
Angut nammineq qitornaminik Sisimiuni piffissami marsip apriilillu akornanni 2020-mi pinngitsaaliisimasutut tallimanngornermi ualikkut kingusissumi pisuutitaavoq. Pania akiuuppoq isimmittaallunilu peerniarsaraluni. Angutip suliapiluni taamaakkaluartoq nammassivaa ima sioorasaariutigaluni:
”Oqaruit, anaanat illillu toqussavassi."
Assingusumik ukiup tulliani pisoqaqqippoq. Angutip panini pinngitsaaleqqippaa, akiuukkaluartorlu atoqatigalugu.
Pisuni arlalinni pisuutitaasoq
Angut pinngitsaaliisarnerup saniatigut persuttaasimasutut kannguttaalliorsimasutullu pisuutinneqarpoq.
Angut arnamut qungasiatigut qimiutsiisimasutut, pisuutitaavoq. Arnaq taama pineqarnerminit anersaartorniarnerminik ajornartorsiulerpoq qungatsimigullu ikilerluni. Angut tamatuma saniatigut arnamut kiinaatigut tilluaalluni isattaallunilu arlaleriarluni persuttaasarsimasutut pisuutinneqarpoq.
Angut aamma marloriarluni kannguttaalliortarsimasutut eqqartuunneqarpoq.
Pisartut siulliit piffissami 2017-imi juulip 15-ianiit 2021-mi marsip 31-anut pisimapput, arnaq iviangiisigut, uppataasigut siffiaatigullu attuualaartarsimagamiuk.
Aamma niviarsiaqqamut pingasuniit aqqaneq marlunnik ukioqalernissaanut taamaaliortarsimaneragaavoq.
Angut unnerluussutini tamani pisuutitaavoq.
Angut pineqaatissinneqarsimasunut ukiuni pingasuni inissiisarfimmiitinneqassasoq unnerluussisussaatitaasut tunngavilersuipput, eqqartuussivillu taama eqqartuussivoq.
