Angut pineqaatissinneqarsimasunut inissiisarfimmit qimaasoq ujaarineqarpoq

20-nik ukiulik Timmy Owen Zeeb, Meeqqamik taaneqartartoq, pineqaatissinneqarsimasut inissiisarfiannit Nuummiittumit ippassaq unnukkut aqqarngup missaani qimaavoq.
Allattoq Jaaku Lyberth
novembarip 05-at 2009 07:05

Suna pillugu pineqaatissinneqarsimanersoq aammalu qanoq iliorluni pineqaatissinneqarsimasut inissiisarfiannit qimaasimanersoq, politiit oqaluttuarisinnaannginnerarpaat.

Politiit tusagassiiutinut nalunaarutaanni Timmy Owen Zeeb, Meeraq, inunnut ulorianaateqarsinnaasumik pinerluttuusoq oqaatigineqarpoq.

Timmy Owen Zeeb 175 centimeterinik angissuseqarpoq, nerinnalluni pualallunilu. Qaamasumik ameqarpoq, taartunik naatsunik nujaqarluni, qimaanerminilu aamma taartunik atisaqartoq nalunaarutigineqarpoq.

Timmy Owen Zeebimik, Meeqqamik, ujaasineq ullaaq qulingiluanut radioaviisimi nalunaarutigineqarnerata kingorna Nuummi politiit inunnit ikittuinnarnit saaffigineqarput, mannalu tikillugu Meeraq nassaarineqanngilaq.

Timmy Owen Zeebimik takunnissimasut sumiinneranillu ilisimannittut Nuummi Politiinut saaffiginneqqullugit kajumissaarneqarput.

Nuummi politiit oqarasuaataata normoraa 32 14 48.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq