Angut panimminik pinngitsaaliisimasutut unnerluutigineqartoq
Angut Ilulissani Qaasuitsup Eqqartuussisoqarfiani ullumi unnerluunneqassaaq.
Unnerluussumi KNR-ip allagaatinik takunniffigisaanni allassimasut malillugit angut pissutsini arfineq-marlunni unnerluutigineqassaaq. Meeqqamik namminerlu meeqqaminik aqqaneq-marluk inorlugit ukiulinnik pinngitsaaliisimasutut, nakuusersimasutut, siorasaarisimasutut kannguttaatsuliorsimasutullu unnerluutigineqassaaq.
Allaaserisap sakkortusinnaanera erseqqissaatigissavarput.
Sisimiuni najukkami panimminik tukertaalluni peerniarsaraluni akiuukkaluartumik 2020-mi marsip apriilillu akornanni pinngitsaaliisimasutut unnerluutigineqartoq unnerluussummi atuarneqarsinnaavoq.
Angut taamaalioriarluni panimminut siorasaarisimasutut unnerluutigineqarpoq, ima oqarnermigut: ”Oqaruit anaanat illillu toqussavassi. Allanut oqassanngilatit”.
Ilulissani najukkami 2021-mi maajip 15-ata 23-atalu akornanni pisumi assingusumi aamma unnerluutigineqarpoq. Angut tassani aamma panimminik akiuukkaluartumik pinngitsaaliilluni atoqatiginnissimasoq, unnerluussummi allassimavoq.
Tilluaanerit kannguttaatsuliornerillu
Pissutsinni allani pingasuni nakuusersimasutut pissutsinilu marlunni kannguttaatsuliorsimasutut unnerluutigineqarpoq.
Unnerluussut naapertorlugu arnamik qungasiatigut allunaasamik 2019-ami qimiutsiisimasutut taamalillunilu anersaartorniarneranik ilungersortitsilluni qungasiatigullu kilertitsisimasutut unnerluutigineqarpoq
Tamatuma saniatigut arnamik arlaleriarluni kiinaagut tilluaasimasutut isattaasimasutullu aamma unnerluutigineqarpoq.
Kannguttaatsuliornermut tunngasut marluk aamma angummut unnerluussutaapput.
Pisumi siullermi arnamik piffissami 2017-mi juunip 15-aniit 2021-mi marsip 31-ata tungaanut arlaleriarluni iviangiisigut uppataatigut siffiaatigullu attuaalaarinnissimasutut unnerluutigineqarpoq.
Niviarsiaqqamut pingasunik ukioqarneraniit aqqaneq-marluliinissaata tungaanut aamma taamaaliortarsimasutut unnerluutigineqarpoq.
Angutip pineqaatissinneqarsimasunut ukiuni pingasuni qaammatinilu pingasuni inissiisarfimmiittussanngorlugu eqqartuunneqarnissaa unnerluussisussaatitaasut kissaatigaat.
