Eqqartuussineq: Angut niviarsiaqqamik 12-it inorlugit ukiulimmik atornerluisoq

Ilulissani eqqartuusiviup aqagu tallimanngornermi suliassaraa, angutip 54-inik ukiullip niviarsiaqqamik ukiukitsumik arlaleriaqaluni pinngitsaaliisarsimaneranik unnerluussut.

Atornerluinerit arfinilinnik ukioqartoq aallartissimapput, aqqanilinnik ukioqartoq unissimallutik. Niviarsiaraq ullumikkut aqqaneq marlunnik ukioqarpoq.

Atornerluinerit unnerluussut malillugu tassaasimapput kinguaassiuutitigut atoqatigiinneq pinnagu allatut kannguttaatsuliornerit.

Angut aamma kannguttaatsuliorfiginnissimasutut unnerluutigineqarpoq.

Kannguttaatsuliorfiginninneq siulleq niviarsiaraq arfinilinnik ukioqartoq pisimavoq. Niviarsiaraq siniffimminiittoq tutsiussimavaa, uppatai kinguaassiuutaalu atisaasa qaavisigut attuualaarlugit.

Kannguttaatsuliorfiginninneq tulleq pisimavoq, niviarsiaraq aqqanilinnik ukioqartoq. Iviangii allakkartersimavai aamma tuiisigut uppataagullu attuualaarlugu.

Unnerluussisussaatitaasut piumasaraat, angut ukiumi ataatsimi pineqaatissinneqarsimasut inissiisarfianniissasoq niviarsiaqqamullu 50.000 koruuninik taarsiissuteqassasoq.

Eqqartuussineq tallimanngornermi ullo'qeqqannginnerani naammassissasoq ilimagineqarpoq.