Unnerluussut: Angut meeqqamik pinngitsaaliisimasutut aamma toqutsinissamik siorasaaruteqarsimasutut unnerluutigineqartoq
Aasianni Qaasuitsup Eqqartuussisoqarfiani ullumikkut nalunaaqutaq 13 pinngitsaaliisimanermik siorasaarisimanermillu suliaq aallartinneqassaaq.
Angut nakuuserneq, siorasaarineq timimigullu nukittunerunini ikiorsiullugit niviarsiaqqamik, 12-it 15-illu akornanni ukioqarnerani, pinngitsaaliisimasutut unnerluutigineqarpoq. Angut taanna niviarsiaqqamut piffissami sivikitsumi ataatassaasimavoq.
Unnerluussut naapertorlugu angutip pinngitsaaliinerata ilaat niviarsiaqqap naartulerneranik kinguneqartitsisimavoq, niviarsiararlu taassuma kingorna ukiormi 14-iliiffimmini Aasiaat Napparsimmaviani naartuersissimavoq.
Aasianni Qaqortumilu 2006-imiit 2009-mut pinngitsaaliisimanerit siorasaarisimanerillu arlaleriarlutik pisarsimapput.
Toqutsinissamik siorasaarisimasoq
Tamassuma saniatigut angut pineqartoq piffissami aamma tassani niviarsiaqqamut toqutsinissaminik siorasaarisimasutut unnerluutigineqarpoq. Unnerluussummi allassimasoq naapertorlugu angut oqarsimavoq ”pinngitsaalineqarsimanini allanut oqaatigippagu niviarsiaqqap ilaqutai toqukkumaarlugit”.
Angutip ukiuni pingasuni qaammatinilu arfinilinni piumasaqaatitaqanngitsumik pineqaatissinneqarsimasunut inissiisarfimmiittussanngortinneqarnissaa unnerluussisussaatitaasut piumasaraat. Taamatuttaaq niviarsiaqqap 100.000 koruuninik taarsiivigineqarnissaa unnerluussisussaatitaasut aamma piumasaraat.
