Nakorsaaneq: Asbest sanaartukkani angiguni ulorianassaaq

Sisimiuni pinerlussimasunut inissiisarfimmi oqoqarlunilu asbesteqartoq januaarimi iluarsartuussisoqarnerani paasineqartoq, KNR-imi oqaluttuaraarput.

Inissinneqarsimasullu peqqissutsimikkut januaarimili eqqugaaqqapput.

- Tassa taamaarrappugut. Naajorarneqalerrappugut taavalu niaqorluttarluta quersornerlu. Arlariippugut taamaattugut, inissinneqarsimasut oqaaseqartartuat kinaassutsimik isertuusserusuttoq oqarpoq. Taassuma aqqa KNR-imi ilisimaaraarput.

Sisimiuni pinerluuteqarsimasunut inissiisarfimmi isersimasut najugaqartiinnarlugit iluarsartuussisoqarpoq. Taamaanneralu, isersimasunut peqqinnanngitsumik sunniuteqartoq, taassuma ilanngullugu oqaatigaa. 

Illumik asbestilimmik iluarsartuussinermi malitassat malinneqarpata, tassani najugaqaannartoqarsinnaasoq, Bispebjerg Hospitalimi nakorsaaneq, asbestimullu tunngasunik immikkut ilisimasalik Harald Meyer oqaluttuarpoq.

Tassalu assersuutigalugu iluarsaassaq assersorneqarluarsimassaaq inillu silaannaa naqitsinikillisillugu silaannarissarneqassalluni. 

-Nalornigaanni pujoralallu siaruaannavianngitsoq qulakkeeqqanngikaanni siunnersuutigiinnassavara illu piaarnerpaamik qimanneqassasoq, Harald Meyer oqarpoq.

Asbestip ipaguaasa Iluarsartuussinermi inunnit najuussorneqarnissa pinaveersimatinniarlugu, assiaquteqartoqarlunilu illersuutinik atisaqartoqarnissaa piumasaqaataasoq, Harald Meyerip ilanngullugu oqaatigaa.

- Iluarsartuussiffimmiit anillannginnermi isaariami atisat taarserneqassapput, taamaalillutit inuit akornannut piguit atisatit pujoralaqassanngillat. Taamaammat sanaartorfiup avataani pujoralaqannginnissaq pingaaruteqartorujussuuvoq, taanna oqarpoq. 

Naak iluarsartuussiffimmiit anillannermi atisat pujoralaqannginissaat piumasaqaataagaluartoq, Sisimiuni pinerluuteqarsimasunut inissiisarfimmi iluarsartuussisut atortulersornatik alakkarterisartut isersimasut oqaaseqartartuata oqaatigaa.

Iluarsartuussinerlu naammaassineqarpat illu asbestip ipaguaanik pujoralaqannginnissaa qulakkeerneqartariaqartoq Harald Meyerip erseqqissaatigaa.

-Iluarsartuussineq naammassippat eqqiaalluarnissaq pingaarpoq, eqqiaareernermilu pujoralaarutivissumanersoq misissorneqassaaq, Harald Meyer oqarpoq.