Angut meeqqamik kinguaassiutitigut atornerluisimasutut pineqaatissinneqarsimasunut inissiisarfimmiittusanngortinneqartoq
![](/sites/default/files/styles/image_934x467/public/sermersooq_kredsret_oktober_2017.jpg?itok=g9a2B9M3)
Angut 28-nik ukiulik niviarsiaqqamik 15-it inorlugit ukiulimmik kujannissimasutut kinguaassiutitigullu allatut atornerluisimasutut meeqqamullu tassunga aamma kannguttaatsuliorsimasutut qaammatini arfinilinni pineqaatissinneqarsimasunut inissiisarfimmiittusanngortinneqarpoq.
Kalaallit Nunaanni Politiit KNR-imut paasissutissiipput.
Angutip tarnikkut timikkullu nukittunerunini atorlugit niviarsiaqqamut septembarip aallaqqaataat 2023-p marsillu 28-at 2024-p akornanni ikinnerpaamik arfinileriarluni niviarsiaqqamik kujassissimavoq imaluunniit kinguaassiutitigut allatut atuisimavoq.
Niviarsiaraq piffissami pinerliffiusumi 14-inik ukioqarpoq, eqqartuunneqartullu tamanna ilisimavaa.
Snapchatikkut attaveqartoq
Pinerliisoq pinerlineqartorlu inoqatinut attaveqaatit aqqutigalugit imminnut ilikkarsimasut, Kalaallit Nunaanni Politiit paasissutissiissutigaat.
Angut 28-nik ukiulik niviarsiaqqamut 14-inik ukiulimmut kannguttaatsuliorluni allakkanik, assinik filmilianillu Snapchatikkut ukiup ataatsip ingerlanerani nassiussisarsimasutut aamma eqqartuunneqarpoq.
Nassiussat tassaasimapput assit, videoliat killissamik qaangiisut aamma atoqatigiinnermik assigisaanillu eqqartuinikkut allakkat niviarsiaqqamut kannguttaatsuliornerusut.
Angut niviarsiaqqamut 25.000 koruuninik taarsiisussanngortinneqarluni eqqartuunneqarpoq.
Angutip eqqartuussut suliassanngorteqqippaa, taamaammat suliaq Nunatta Eqqartuussisuuneqarfiani piffissami kingusinnerusukkut suliarineqassaaq.