15 inorlugit ukiulimmik kujannissimasutut angut unnerluutigineqarpoq

15-nit inorlugit ukiulimmik kujannissimasutut unnerluussinerup saniatigut angut 28-nik ukiulik aamma Snapchat aqqutigalugu allattarsimasutut, assinik videolianillu nassitsisimasutut meeqqap killissarisaanik qaangiisutut unnerluutigineqarpoq.

Allattoq Jokum Nielsen

septembarip 02-at 2024 13:55

Inatsisinik unioqqutitsinerup nalaani 14-ininik ukiulimmik kujannissimasutut angut 28-nik ukiulik Sermersuumi eqqartuussivimmi Nuummi pingasunngorpat unnerluutigineqartoq eqqartuunneqassaaq.

KNR-ip eqqartuussineq pillugu paasissutissanik qinnutigisaani allassimavoq.

Aamma atuarukNunatta Eqqartuussisuuneqarfia: Angut meeqqamik kujannissimasutut eqqartuunneqartoq

Ikinnerpaamik arfinileriarluni kujanninnerit pisimapput septemberip aallaqqaataani 2023-imi martsip 28-niit 2024 tikillugu.

Unnerluussissummi allaqqavoq angutip tarnikkut timikkullu nukittunerunini atorsimagaa aamma niarsiaqqap ukiui ilisimasimagai.

Kannguttaatsuliorneq

Niviarsiaqqamut tassunga kannguttaatsuliornerit assigiinngitsut pillugit 28-nik ukiulik aamma unnerluutigineqarpoq.

14-inik ukiulimmut 2023-imi tamarmi Snapchatsikkut angut allalluni, assinik aamma videonik nassitsisarsimavoq.

Nassiussat tassaasimapput qaangiilluni assit, videot allatallu soorlu kujanneq pillugu allallu niviarsiaqqap killisarisarisaanik qaangiisut.

Pinerluuteqarsimasunut isertitsisivimmut qaammatit pingasuniit ukiup affaanut isertinneqassasoq tamassumalu qaavatigut 25.000 koruuninik taarsissussaatitaasutut unnerluussisut piumasaraat.

Nutaarsiassami kukkunermik nassaarsimaguit uunga allaffigineqarsinnaavugut.