Angut kiinarpalerluni ujajaasoq suli ujaarineqartoq
Qaqortumi Brugseneeqqami sulisut angummit kiinarpalimmit savilisartumik siorasaarneqarput, taassumalu aningaasat qanoq amerlatigineri ilisimaneqanngitsut tiguai.
Politiit pinerluttumik sapaatip akunnerata naaneranili ujaasilerput, iluatsinngitsumilli.
- Ilisimannittunik suli amigaateqarpugut, suliamut atatillugu pinerluttumik tigusarinninngilagut, Kalaallit Nunaanni Politiinit Preben Kleist oqarpoq.
Taamaammat innuttaasut pisumut ilisimannittut imaluunniit pinerluuteqartup kinaaneranik ilisimannittut politiinut saaffiginninnissaannik kaammattuutigaa.
Videoliutikkut nakkutilliissummit immiussaq saqqummiunniaraat
Pinerluuteqartoq politiit ujaarisaat 160-170 centimeterit akornanni angissuseqarpoq, ujajaanermini qaqortumik kiinarpaqarpoq, qernertumik kavaajaqarluni, qaqortumillu qalipaataarpasissortaqarluni, aamma qarliit tujuulullu nasartalik qernertut atorpai.
- Videoliutikkut immiussaq pissarsiaraarput, taanna allamik periarfissaqanngikkutta tamanut saqqummiunniarparput, pigaartut pisortaat oqarpoq.
Politiit suliaqarnerannut paasissutissaateqaruit Qaqortumi politiinut 70 11 22-mut imaluunniit Kalaallit Nunaanni Politiinut 70 14 48-mut saaffiginnissinnaavutit.
