Politiit ullormut nalunaarusiaat: Angut inuusuttoq Qinngorpumi niuertarfimmi tillinniarneragaasoq tigusaraarput

Nuummi Qinngorpumi Brugsenimi tillinniartoqartoq, Kalaallit Nunaanni Politiit pingasunngornermi unnukkut nalunaarfigineqarput. Angut 18-inik ukiulik tillinniarneragaasoq tillinniarfigineqartumi tigusaavoq.

Kalaallit Nunaanni Politiit pigaartuisa pisortaat, Ole Hald, ullaaq manna taama ilisimatitsivoq.

Tillinniartoqarneranik unnukkut qulingiluanngulersoq nalunaarfigineqareerlutik tillinniarneragaasoq unnukkut qulit missaanni ajornaquteqanngitsumik tigusarigitsik, politiit pigaartuisa pisortaat oqarpoq.

Tassa angut tillinniarneragaasoq niuertarfimmi sulisunut savilersornissamik sioorasaarisimagaluartoq ajornaquteqanngitsumik tigusaavoq.

- Angut taanna niuertarfimmi sulisunit atassuteqarfigineqarami saveqarnerarluni pisariaqarpallu savilersussanerarluni sioorasaarisimaneragaavoq, Ole Hald oqarpoq.

Oqaasiinnartigut sioorasaarisimasoq

Politiit angut tillinniarneragaasoq savilersornissamillu sioorasaarisimaneragaasoq tigusarimmassuk timaatigut sattallugu misissoramikku savimmik nassaarfigisimanngilaat.

Angut taanna tigusaareerluni isertitsivimmiiittoq ullumi killisiorneqassaaq pinerlussimasutullu unnerluutigineqassalluni. Ullumi killisioreerunikku iperarniarlugu, politiit aalajangerput.

- Isertitsivimmi unnuivoq, tigummigallagaaginnarnissaalu pisariaqarsorinnginnatsigu unnerluutigereerutsigu iperassavarput, Ole Hald oqarpoq.

Angut taanna ilisimaarineritsik, politiit pigaartuisa pisortaata oqaatigerusunngilaa.

Avannaani aqqusinermi perulluliortoqartoq

Nuummi pisoq eqqaassanngikkaanni allamik ulapputeqangaarsimanatik, politiit nalunaarput.

Kisianni Ilulissani aqqusinermi perulluliortoqarsimasoq ajornerusumilli pisoqarsimanngitsoq, politiit pigaartuisa pisortaata aamma ilisimatitsissutigaa.

- Pigaartup aqqusinermi perulluliortut naammattuukkani eqqissisarsimammagit ajornerusumik pisoqanngilaq, politiit pigaartuisa pisortaat oqarpoq.

Taamaammat aqqusinermi perulluliortut pillugit suliassanngortitsiniarnatik, taanna ilisimatitsivoq.