Angummut Aappilattumi savimmik toqutsisimasutut unnerluussamut tunngasoq suliarineqalertoq
Angummut Nanortalimmeersumut Kujataani Aappilattumi angummik siorna aggustip 14-iani toqutsisimasutut unnerluussamut tunngasoq marlunngorpat suliarineqalissaaq.
Angut taanna angummik 35-nik ukiulimmik savimmik arlaleriarlugu kaporlugu toqutsisimasutut unnerluussaasoq, unnerluussissummi allaqqavoq.
Angutip unnerluussap angut 35-nik qasseriarlugu kaporsimaneraa, unnerluussissummi allaqqanngilaq.
Toqutsineq Aappilattumi angerlarsimaffiit ilaanni ullaakkut nalunaaqutaq tallimat arfernullu akornanni pivoq. Pinerluttoqarsimaneranik misissuisartoq toqusunillu misissuisartoq Danmarkimeersut Aappilattumi misissueqqissaarnermi ikiuukkiartorput.
Uunnerluussaq taamanikkut 33-nik ukioqarpoq.
Allat aningaasaataannik qoorortuusisimasoq
Angut taanna toqutsisimasutut unnerluussaaginnanngilaq. Qarasaasiatigummi tallimariarluni peqquserlussimasutut aamma unnerluussaasoq, unnerluussissummi allaqqavoq.
Angut taanna aningaasanik tigutsit allap pigisaa atorlugu aningaasanik Nanortalimmi Pilersuisumi 2019-imi februaarip aallaqqaataata sisamaatalu akornanni tigusisarsimavoq. Aningaasat tigusani taakku Pilersuisumi, Brugsenimi, Café 44-mi Café Birnamilu pisiniutigisarsimavai. Ilaatigut qoorortuumik Stevensimik nipikillisaatilimmik qinnutilimmillu qoorortuumullu kaliber 22-mut imassanik 50-inik aamma pisiniutigisimagai, unnerluussissummi allaqqavoq.
Aamma aningaasanik tigutsisit aamma allat pigisaat atorlugit aningaasanik 2019-imi januaarip pingajuata februaarillu aallaqqaataata akornanni pingasoriarluni tigusisimasutut unnerluussaavoq. Angingaasallu taakkua Pilersuisumi pengeautomatimit tigusimavai. Aningaasat tigusimasaata amerlassusaasa unnerluussissummi allaqqaneri qallerlugit titarneqarsimammata katillutik qanoq amerlatiginersut ilisimanngilarput.
AAMMA ATUARUK Angut 33-nik ukiulik Aappilattumi toqutsisimasutut pasineqartoq
Qarasaasiatigulli pinerliiniarnerisa ilaanni itigarsimavoq. Aningasanimmi tigutsit aamma allap pigisaanik Nanortalimmi Pilersuisumi 2019-imi februaarip sisamaani tiguseriaraluarsimavoq. Tigusisinnaasimannginnamili iluatsissimanngitsoq, unnerluussissummi allaqqavoq.
Angummut tassunga suliaq Eqqartuussisoqarfik Kujallermi sapaatit akunnerata tulliani ulluni pingasuni, tassa marlunngornermi, pingasunngornermi sisamanngornermi suliarineqassaaq.
Unnerluussap illersuisua Bjørn Pustu Chemnitz oqaloqatiginiarsimagaluarparput. Taannali suliaq pillugu oqaaseqarumanngikkallarpoq.
