Angut 61-inik ukiulik meeqqamik kinguaassiuutitigut pinngitsaaliisimasutut eqqartuussaasoq
Angut 61-inik ukiulik meeqqamik qulingiluanik ukioqarnerani kinguaassiuutitigut pinngitsaaliisimasutut ullumi eqqartuunneqarpoq. Eqqartuussiveqarfik Qaasuitsumi eqqartuussut piffissami aalajangigaanngitsumi paarineqarnissaanik imaqarpoq. Kalaallit Nunaanni Politiit tusagassiuutinut taama allapput.
Angut niviarsiaqqamik nammineq angerlarsimaffimmini kinguaassiuutitigut pinngitsaaliisimasutut pisuutinneqarpoq. Aamma pinngitsaaleeriaraluaqattaarsimasutut innarlikkamullu taasumunnga kannguttaalliorsimasutut eqqartuussaavoq.
Innarliinerit 2020-miit 2022-imut pisimapput politiinullu siorna maajimi kalerriutigineqarlutik. Angut taanna taamanili tigummigallagaavoq.
Suliap suliarineranut atatillugu tarnikkut misissorneqarpoq, taamaaliorneqarneralu unnerluussisussaatitaasut paarineqarnissaannik piumasaqarnerannut pissutaaqataavoq.
Unnerluussisussaatitaasut naammagisimaarinnittut
Kissaallu taanna eqqartuussisut eqqartuussinerminni tusaavaat, unnerluussisussaatitaasup iluarisimaagaanik:
- Unnerluussaasoq qulingiluanik ukiulimmut innarliinermi saniatigut assingusumik eqqartuussaareernikuuvoq. Taamaammat angut inuiaqatigiit inuinut ulorianartuusutut isigaara, tamannalu eqqartuussiviup isumaqatigaa, unnerluussisussaatitaaneq Gutti Harryson, suliamik Eqqartuussisoqarfik Qaasuitsumi sassaassisuusoq, tusagassiuutinut nalunaarummi issuarneqarpoq.
Aamma suliap, "angutip inersimasup niviarsiaqqamut qulingiluanik ukiulimmut peqqarniitsumik pinerliineranut tunngasup", ilungersunartuunera erseqqissarpaa, politiillu suliat taama ittut ilungersornartorujusssuartut isigisaraat aamma erseqqissarlugu.
Angut eqqartuussut suliassanngorteqqissanerlugu eqqarsarfissaqarumasimavoq. Eqqartuussutilli suliarineqaqqeratarnissaanut eqartuussutilluunniit piviusungortinneqarnissaata tungaanut tigummigallagaassaaq.
