Angut 60-inik ukiulik angajuminik toqutseriaraluarsimasutut pineqaatissinneqarsimasunut inissiisarfimmiittussanngortinneqartoq
Angut 60-inik ukiulik toqutseriarsimasutut, nakuusersimasutut sioorasaarisimasutullu pingasunngormat pisuutinneqarpoq. Tamanna Eqqartuussisoqarfik Kujallermi pivoq, tassani angut ukiuni sisamani qaammatinilu arfinilinni pineqaatissinneqarsimasunut inissiisarfimmiittussanngorlugu eqqartuunneqarluni.
Taama Kalaallit Nunaanni Politiit tusagassiorfinnut allapput.
60-inik ukiulik angajuminik angajuata Narsami angerlarsimaffiani siorna novembarip pingajuani saassussisimasutut pisuutinneqarpoq.
Politiit naapertorlugit eqqartuunneqartup angajuni timaanut niaquanullu tilluaallunilu tukertaasimavoq. Oqarsimavoq angajuni toqunniarlugu savimmillu iffianut kitserummik kaperiarsimallugu kiinaatigut eqqorlugu.
Angajuusoq eqqaani utoqqaat illuannut qimaasimavoq, ilisimajunnaannginnerminilu ikiortissarsiorsinnaasimasoq, politiit ilisimatitsipput.
Ajoqusernerit peruluutit arlaqartut
Saassunneqarnermini peruluutigisaminik arlalinnik ajoquserneqarpoq Nuummilu Dronning Ingridip Napparsimmavianut katsorsartikkiartorluni aallarunneqartariaqarsimalluni.
Nukaa 60-inik ukiulik toqutseriarsimasutut siornatigullu angajuminut nakuusersimasutut allanullu siorasaaralunilu nakuusersimasutut unnerluutigineqarpoq. 60-inik ukiulik toqutseriarsimasutut pinngitsuunerarpoq angajuminulli nakuusersimanini nassuerutigalugu.
Eqqartuussisoqarfik Kujallermi angut unnerluutigineqartunut pisuutinneqarpoq.
Qatanngutaasoq toqutaasimasinnaagaluartoq
Eqqartuussut unnerluussisup Cecilie Stürup Sørensenip naammagisimaarutigaa:
- Angajuusoq ikiortissarsiorluni qimaasimasinnaanngikkaluarpat suliaq ullumikkut toqutsinermut tunngassuteqarsimassagaluarpoq. Pinerlineqartup ajoquserneri ima ilungersunartigisimapput katsorsarneqarnissamillu pisariaqartitsisimatigalutik qularutigineqarsinnaanani eqqartuunneqartup siunertaa suusimanersoq, tusagassiorfinnut nalunaarummi oqarpoq.
- 60-inik ukiulik nakuusernernut siorasaarinernullu allanut ilutigitillugu eqqartuunneqarpoq, taamaammat eqqartuussivimmit ukiunik sisamanik qaammatinillu arfinilinnik pinerluuteqarsimasunut inissiisarfimmiititsinissamik piumasaqarnitta malinneqarnera naammagisimaartorujussuuara.
