Angut 25-inik ukiulik meeqqanut marlunnut pinngitsaaliisimasutut eqqartuussaasoq
Nunatta Eqqartuussiviani meeqqanik kinguaassiutitigut peqqarniitsumik atornerluisimasutut ataasinngornermi februaarip 13-ianni suliaq ingerlanneqarpoq. Nuummeersoq angut 25-nik ukiulik ukiunik pingasunik qaammatinillu arfinilinnik pinngitsaaliilluni atoqateqarsimasutut piumasaqaatitaqanngitsumik pineqaatissinneqarsimasunut inissiisarfimmiittussanngortinneqarpoq.
Angutip niviarsiaqqat marluk aappaa aqqanilinnik aappaalu 14-inik ukiulik 2016-imi 2020-ilu pinngitsaalillugit atoqatigisimavai.
Kalaallit Nunanni politiit tusagassiuutinut allapput.
- Suliap uuma pinerliisarnernik oqaluuserinnittuarnerup pinerlineqartullu politiinut nalunaarutiginnittarnissaannik kaammattuisarnerup iluaqutaanera uppernarsarpaa, aamma qangali pisimasuugaluarpalluunniit. Pinerluttuliorfiginnitsip nalunaarutiginissaa kingusinaanngisaannarpoq, unnerluutiginnittussaatitaasoq Alexander Stürup tusagassiutinut nalunaarummi isuarneqarpoq.
Niviarsiaqqap atornerlunneqarnerminiit ukiut marluk qaangiunneranni aatsaat unnerluussinera peqqutaalluni pisoq 2016-imeersoq aatsaat eqqartuussissutigineqarneranut peqqutaavoq.
Sakkortusisamik pineqaatissinneqarsimasunut inissiisarfimmiissasoq
Angutip ukiuni marlunnik pineqaatissinneqarsimasunut inissiisarfimmiittussanngortinneqarnissaa eqqartuussiviup aalajangerpaa, unnerluussisussaatitaasup, Alexander Stürupip, oqarnera naapertorlugu unnerluussisussaatitaasut piumasaqaataat malillugu pillaaneq sakkortusineqarpoq.
- Pinngitsaaliilluni atoqatiginninneq peqqarniitsumik pinerluttuliorneruvoq, eqqugaasumullu sakkortuumillu kinguneqartarluni. Suliamilu uani pinngitsaaliilluni atoqateqartoqaannanngilaq, uani meeqqat marluk ukiukitsut pineqarput. Taamaammat pineqaatissiineqarsimasunut inissiisarfimmiittussanngortitsinissamut pillaatip sakkortusineqarnera iluarisimaarpara, taanna oqarpoq.
Meeqqanut inuusuttunullu 18-it inorlugit ukiulinnut kinguaassiutitigut atornerluisimasunut pineqaatissiisarneq siorna julimi 50 procentimik sakkortusineqarpoq. Pinerlunnerilli siorna juulip aallaqqaataata kingorna pisut taamaallaat pillaanermi atorneqarsinnaapput, taamaammat angut sakkukinnerusumik pineqaatissinneqarpoq.
- Pinngitsaaliilluni atoqateqarsimaneranut massakkut pineqaatissiissutigineqartoq, siorna aasakkut pisimasuugaluarpat ukiuni tallimani piumasaqaatitaqanngitsumik pineqaatissinneqarsimasunut inissiissarfimmiittussanngortinneqarsimassagaluarpoq, Alexander Stürup oqarpoq.