Angut 22-nik ukiulik Fieldsimi aallaasersorsimasutut tigummigallagassanngortinneqartoq
Angut 22-nik ukiulik inunnik pingasunik toqutsisimasutut inunnillu arfineq-marlunnik toqutseriarsimasutut pasineqartoq tarnikkut nappaatilinnut immikkoortortaqarfimmi matoqqasumi ulluni 24-ni tigummigallagassanngortinneqarpoq.
Inuit parnaarussivimmi nalinginnaasumi tigummigallanngortinneqarsinnaanngitsutut nalilikkat tarnikkut nappaatilinnut immikkoortortaqarfimmi matoqqasumi tigummigallagassanngortinneqartarput.
Angut 22-nik ukiulik inatsit tunngaviusoq naapertorlugu nalunaaquttap akunnerini marlungajanni killisiorneqareersorlu tarnikkut nappaatilinnut immikkoortortaqarfimmi matoqqasumi tigummigallagassanngortinneqassasoq, Københavnimi eqqartuussivimmi eqqartuussisup ullumi ataasinngornermi aalajangerpaa.
Københavnimi politiit pisiniarfissuarmi Fieldsimi aallaasersortoqartoq sapaammi nalunaaqutaq 17.36 (danskit nalunaaqutaat) nalunaarfigineqarput.
Politiit oqarnerat naapertorlugu Fieldsimi sumiiffinni assigiinngitsuni marlunni seqqortoqarpoq.
Inuit pingasut toqutaapput. Nukappiaraq niviarsiararlu 17-inik ukiullik kiisalu angut russitut innuttaassuseqartoq 47-nik ukiulik Danmarkimili najugaqartoq.
Tamatuma saniatigut inuit sisamat aamma eqqorneqarput. Taakkunannga ataaseq peruluppoq.
Inuit allat 23-t aallaasersortoqarnerani aamma ajoqusersimapput.
Politiit angut 22-nik ukiulik danskisut innuttaassuseqartoq aallaasersortoqarnerata kingorna tigusaraat.
Angut ataasinngornermi inatsit tunngaviusoq naapertorlugu killisiorneqarpoq. Angut taanna tarnikkut nappaatilinnut immikkoortortaqarfimmi matoqqasumi ulluni 24-ni tigummigallagassanngortinneqarpoq.
Ilaatigut pasineqartup 22-nik ukiullip unnerluussutini pisuutinneqarnissaanut tunngavissaqarnera peqqutaalluni tigummigallagassanngortinneqarpoq.
Angut 22-nik ukiulik taanna angummik 47-nik ukiulimmik, niviarsiaqqamik 17-nik ukiulimmik nukappiaqqamillu 17-inik ukiulimmik toqutsisimasutut pasineqarpoq. Tamatuma saniatigut inunnik arfineq-marlunnik toqutseriarsimasutut aamma pasineqarpoq.
Pinerluttulioqqerataannaanissaa ernummatigineqartoq
Ilisimannittunik apersueqqissaarnerit, videomik nakkutilliissummik immiussanit assit angutillu 22-nik ukiullip tigusarineqarnerani aallaammik tigummiaqarnera, eqqartuussisup taama aalajangernermini pingaarnertut tunngavilersuutigai.
Angut pasineqartoq pinerluttulioqqerataannaanissaa aamma ernummatigineqarmat tigummigallagassanngortinneqarpoq.
- Pasineqartoq tigummigallagassanngortinneqanngippat assingusumik pinerluttulioqqerataannaanissaa ernummatigineqarpoq, eqqartuussisoq oqarpoq.
- Pasineqartup oqaaseqarusussappat killisiorneqaqqinnissaa aamma ilisimannittorpaalunnik taavalu pasisap ilaqutaanik ilisarisimasaanillu apersorneqarnissaat pingaarnertut tullernguupput, eqqartuussisoq oqarpoq.
AAMMA ATUARUK Sara Brandt Fieldsimi perusuersartarfimmi minutsit 15-ingajaat toqqoqqasoq
Pasineqartorlu tigummigallagassanngortinneqanngippat pasineqartup pinerluttoqarsimaneranik paasiniaanermik naammassiuminaallisitseratarsinnaanera aamma ernummatigineqarpoq.
- Ingammik uppernarsaatissanik piiaarartarsinnaanera inunnullu allanut sioorasaareratarsinnaanera kimigiiseratarsinnaaneralu ernummatigineqarpoq, eqqartuussisoq nassuiaavoq.
Ualikkut arfinermut qiteqqunerani aallaasersortoqalertoq
Angummut 22-nik ukiulimmut unnerluussut unnerluussisussaatitaasup Søren Harbop eqqartuussinerup aallartinnerani atuarpaa.
- Inuit qulit pinerlineqarsimasut unnerluussummi allaqqavoq. Tamatuma saniatigut inuit allat ikilerneqanngikkaluarlutik allatigut ajoqusersimasut arlaliupput. Taakku unnerluussummi suli ilanngunneqanngillat. Ilanngunneqassanersut suli aalajangerneqanngilaq, Søren harbo oqarpoq.
Inuit pingasut angummik Amagerimi pisiniarfeqarfissuarmi Field'simi sapaatiummat ualikkut arfernup qiteqqunnerata missaani aallaasersortoqarnerani toqutaapput.
AAMMA ATUARUK Lars Therkelsenip politiit sakkulersorsimallutik Fieldsip saaniittut takugai
Pisiniarfeqarfissuarmi inuit aallaasersortoqarnerani uiverrapput. Inuit ilarpassuit aniffissat arlaliusut ilaat aqqutigalugu qimarrapput, massa inuit ilaat pisiniarfiit ilaanni pisiniarfiillu tunorliisa ilaanni toqqorput.
Aallaasersortoqartoq, Københavnimi politiit ualikkut arfernup qiteqqunnerata missaani kalerrinneqarput.
Angut 22-nik ukiulik pisiniarfeqarfissuup silataani nalunaaqutaq 17.48 ajornaquteqanngitsumik tigusarineqartoq, Københavnip politiivini chefpolitiinspektøri Søren Thomassen tusagassiortunut sapaatiummat unnukkut sassarnermini ilisimatitsivoq.
Angut 22-nik ukiulik unnerluussutini pisuunerarsimanersoq pisuunnginnerarsimanersorluunniit ilisimatitsissutigineqanngilaq.
