Politi: Angut 19-nik ukiulik politiinit ujaarineqartoq saassusseqataasimasutut pasineqartoq
Angut saassunneqartoq saassunneqarnini tupaassutigivaa, oqaloqatigisinnaallutigulu, Kalaallit Nunaanni politiini pigaartut pisortaat Malik Olesen KNR-imut taama oqaluttuarpoq. Angut saassunneqartoq Sisimiuni napparsimmaviliaanneqarpoq tassanilu passunneqarluni.
Saassunneqartup oqaluttuarnera naapertorlugu saassussissut ilagaat, maanna sapaatit akunnerini pingasunngulersuni politiinit ujaarineqartoq 19-nik ukiulik Minik Olinnguaq Konrad Olsen. Taanna siorna decemberip ulluisa 23-anni sakkortuumik saassussinerata kingornali Sisimini ujaarineqalerpoq.
Saassussisoqarnerata kingorna politiit ullaarmanna ujaasinertik annertusivaat.
- Saassussisoqarnera pillugu sumiiffiit allat periarfissallu ujaasiffilerpagut.
- Saassussisimasutut pasineqartut ujaarineqarnerat annertusivarput, Malik Olesen oqarpoq.
Saassussisimasutut pasineqartut, simaanngikkunik tallimat ujaaralugit politiit unnuarli aallartipput.
- Politiini suleqatigut allat ullaarnganiit sulisippagut, ujaarineqartut ulloq naallugu ujaariniassammatigit, Malik Olesen oqarpoq.
Kattussilluni saassussineq sumik tunngaveqarnersoq pissuteqarnersorluunniit politiit paasissutissiissutigisinnaanngilaat.
Angutit kattussillutik saassussisut sumiinnerannik ilisimasaqaruit sumiissinnaanerannilluunniit pasitsaassaqaruit politiinut attaveqaqquneqarputit oqarasuaammut 70 14 48-mut.
