Toqutsisimasutut pasisaq: Angut 18-inik ukiulik ulluni 25-ni tigummigallagaasoq
Angut 18-inik ukiulit toqutsisimasutut pasisaalluni tigummigallagaavoq.
Kalaallit Nunaanni Politiit tusagassiorfinnut taama nalunaarput.
Angut taanna 18-inik ukiulik angummik 22-nik ukiulimmik toqutsisimasutut pasisaalluni sapaatiummat ullaassakkut nalunaaqutaq 01:55 tigusaavoq. Angut 22-nik ukiulik savimmik kapineqarsimasoq Aasianni Wille Brandtsvejip aqquserngani ullaassakkut ataatsip missaani nassaarineqarpoq.
Politiit peqqinnissaqarfimmeersullu ornigutipallapput, angullu ikioqqaarneqarpoq. Annaanneqarsinnaasimanngilarli toqusutullu kingorna nalunaarutigineqarluni.
Angut 18-inik ukiulik Eqqartuussisoqarfik Qeqertalimmi inatsit tunngaviusoq malillugu sapaatiummat killisiorneqarpoq.
Angullu taanna ulluni 25-ni tigummigallagaassasoq, tassani aalajangerneqarpoq.
Kalaallit Nunaanni Politiit toqutsinermik suliaq pillugu paasissutissiinerusinnaanngillat, inuillu suliamut tassunga attuumassutilinnik paasissutissaatillinnit attavigeqqupput.
Politiit 70 14 48-mut sianerluni attavigineqarsinnaapput.