Angerlarsimaffimmi eqqissiviilliornerit oqallisigineqassapput
Politeeqarfiit ulloq unnuarlu nalunaarsuiffii sapaatip akunneri tamaasa angerlarsimaffimmi eqqissiviilliortoqarsimaneranik arlalinnik nalunaarsuiffiusarput. Politiittaaq angerlarsimaffiit eqqissiviilliorfiusut eqqissisaaffigiartukkatik meerartaqarnerat paasikkajuttarpaat.
Inatsisartuni ilaasortaq Akitsinnguaq Olsen, taamatut ineriartortoqarnerata unitsinneqarnissaanut Naalakkersuisut pilersaarutaanik ujartuilluni paragraf 37 tunngavigalugu apeqquteqaateqarpoq.
Naalakkersuisut upernaakkut ataatsimiinnissamut periusissatut iliuusissatullu pilersaarummik saqqummiussaqassasut, Ilaqutariinnermut taamatullu aamma isumaginninnermut naalakkersuisoq paasissutissiivoq.
- Suliniutini ilaatigut pineqarput inunnut suliamik ilisimasalinnut atuagaaqqat najoqqutassiat, ilaqutariinni inuusuttullu akornanni annersaasarnerit qitiutillugit paasititsiniaanerit, annersaasartunut katsorsarneqarnissamik neqeroorutit, qarasaasiakkut iserfigineqarsinnaasumik nittartagaqarneq, arnanut annersarneqarsimasunut ataatsimoorfissaq, inunnut suliamik ilisimasaqartunut pikkorissartitsinerit allarpassuillu, Mimi Karlsen akissuteqarluni allappoq.
Isumaginninnikkut ajornartorsiutit, nakuuserneq kingornatigullu politiinit eqqartuussivikkullu suliarineqarneri atituumik suleqatigiinnikkut aatsaat aaqqiissuteqarfigineqarsinnaapput. Iliuusissap ilaatigut imarai nakuuserfigineqarsimasunut ikiuinissamik neqerooruteqarnissaq nakuusertartullu katsorsarneqarnissaannik neqerooruteqartarnissaq.
- Naalakkersuisut isumaqarput naalagaaffimmi oqartussat eqqartuussiveqarnermik akisussaallutik suliaqartuusut akisussaaffittut suliaminnik isumaginninnissaannur nukissanik pisariaqartinneqartunik tunineqartariaqartut. Naalakkersuisut Kalaallit Nunaanni eqqartuussiveqarnerup iluani qanoq amerlatigisunik sulisoqarnissaa pillugu tigussaasunik anguniagaqanngillat, kisiannili suliassaqarfimmi naapertuuttuunngitsunik pisoqassagaluarpat naalagaaffimmi akisussaallutik oqartussaasut ingerlaavartumik ilisimatinneqartarput. Taakkununnga assersuutigalugu ilaapput kredsrettini suliamik sivisuumik suliaqartarnerit pineqaatissinneqarsimasunullu inissiisarfinniinnissamut utaqqisorpassuit, Mimi Karlsen oqarpoq.
