Angerlarsimaffeqanngitsut aningaasanik tigutsisitaarnissaat periarfissaalertoq

Angerlarsimaffeqanngitsoq Kunnak Steffensen takkunani ilaavoq:

- Soorlu koortitaarsinnaaneq NemIditaarsinnaanerlu takkua aalajangersimasumik najugaqarfeqannginnatta taakkununnga itigartitaasarpugut, angerlarsimaffeqanngitsoq Kunnak Steffensen taama oqarpoq.

Kommuneqarfik Sermersuumi angerlarsimaffeqanngitsut 469-ipput - angerlarsimaffeqanngitsullu aalajangersimasumik najugaqarfeqannginnertik pissutigalugu allagarsiassatik kommuunimut aasaraluarpaat - aallersinnaanerli siorna juulip aallaqqaataanit unitsinneqarpoq. Allagarsisummi ilaasa allagarsiassatik aanngitsoortarsimavaat:

- Ilumoorpoq Innuttaasut Sullissiviani allakkanik aallersinnaaneq periarfissaasimanngitsoq, taamanikkut allagarsiassarpassuit ukioq ataaseq sinnerlugu uningasut nassiussisumut utertinneqarput, angerlarsimaffeqanngitsullu aggertartut qaammatit marluk sioqqullugit kalerrinneqallattaapput Innuttaasut Sullissiviani allakkanik tigooraasarneq unitsinneqassasoq, Kommuneqarfik Sermersuumi Innuttaasunut Sullissivimmi pisortaq Lone Rosengreen Pedersen oqarpoq.

Angerlarsimaffeqanngitsulli allagarsisinnaalernissaat februarimi periarfissaalerpoq perariarfissarli maannamut atorneqarsimanngilaq.  Maannalu GrønlandsBankeni Telepostilu suleqatigiillutik angerlarsimaffeqanngitsut allagarsisinnaalernissaat aaqqiissuteqarfigaat.

Angerlarsimaffeqanngitsut Telepostimut saaffiginnereerunik kommunimi inunnik nalunaarsuiffimmukassapput tamatumalu kingorna GrønlandsBankenimut saaffiginnissallutik.

 - Taava taamaalioreerunik uatsinnut saaffiginnissapput - uagullu akiliummik NemIDimillu bestilliissussinnaavagut,
GrønlandsBankenimeersoq Helle Mark oqarpoq.

Periarfissaq nutaaq aallartinneqareeraluartoq angerlarsimaffeqanngitsut paasissutissinneqarnissartik pisariaqartikkaat Kunnak Steffensen oqarpoq:

- Qanorpiaq pilersaaruteqartoqarnersoq ersarinnerusumik, Kunnak Steffensen oqarpoq.
 
Nunatsinnimi angerlarsimaffeqanngitsut 900-t tungaannoorput GrønlandsBankenillu annerusumik paasissutissiinissaq sulissutigisussanngorpaa:

- Suu tassa Illit saaffiginninnerit aamma tassuunatigut erserpoq suliassaqartugut tassuunatigut, GrønlandsBankenimi sullissivimmi aqutsisoq, Helle Mark taama oqarpoq.