Angallatit Islandimi nakkutigineqarnerunissaat GE-p kissaatigaa

Islandimi politiit Polar Seafoodip kilisaataataani Polar Nanumi, Reykjavikimi tulaqqasumi ikiaroornartumik hashimik 20 kiilumik sapaatip-akunnerata siuliani nassaarput, Polar Nanumilu inuttat ilaat tassunga atatillugu politiinit tigusarineqaraluarpoq maannali iperagaaqqissimalluni.

GE tamanna pillugu Islandip Nunatsinni generalkonsulianut oqaloqatiginninnialerpoq, Islandimi nunatsinnilu oqartussat ikiaroornartumik anngiortumik eqquisiniartarnerup aaqqissuussaanerusumik akiorniarneqarsinnaanissaannut periarfissat oqaloqatigissutigineqassallutik:

- Kalaallit kilisaataataasa Islandimi tulaqqasut misissuiffigineqartarnerat annertusarneqarsinnaava? Brian Buus Pedersen aperivoq.

Siumut nalunaarutigineqarsimanngitsumik pakasaallunilu misissuinerit aqqutigalugit hashimik anngiortumik eqqussueriartarnerit ikilisarneqarsinnaanissaat matumani anguniagaasoq, taassuma oqaatigaa:

- Imaassinnaasormi sakkortuumik Islandimi misissuisoqarsinnaanera eqqussuiniarnermik unitsitsisinnaasoq, Brian Buus Pedersen oqarpoq.

GE-p nunatsinni oqartussat misissuisinnaanissamut periarfissat pillugit aamma oqaloqatiginiarpai. Umiarsuaatileqatigiillu namminneq suliniuteqarsinnaasariaqarnissaat aamma mattutinngikkini Buus Pedersenip aamma oqaatigaa:

- Tamanna mattukkusunngilara. Anngiortumilli eqqussueriartoqartarnerannik ilisimannittut oqaloqatigilluarneqarnissaat pisariaqassaaq, taakkuummatami qanoq-iliuuseqarnissamut ilisimannittut, GE-p pisortaa Brian Buus Pedersen KNR-imut taama oqarpoq.